અમદાવાદ : અમદાવાદ શહેરના સી.જી.રોડ અને મ્યુનિસિપલ માર્કેટ વિસ્તારમાં પોલીસ અને ટ્રાફિક વિભાગ દ્વારા મોડી રાત્રે એકાએક મેગા ડ્રાઇવનું આયોજન કરવામાં આવ્યું હતું.આ ખાસ ડ્રાઇવ દરમિયાન પોલીસે માત્ર છ કલાકમાં કુલ 106 વાહનો ડિટેઇન કરી કાયદેસરની કાર્યવાહી હાથ ધરી હતી. ખાસ કરીને મોડિફાઇડ વાહનો, નંબર પ્લેટ વગરના વાહનો, ફેન્સી નંબર પ્લેટ અને ટ્રાફિક નિયમોનું ઉલ્લંઘન કરનારા ચાલકો સામે કાર્યવાહી કરવામાં આવી હતી. મોડી રાત્રે સ્ટંટબાજી અને નિયમભંગની ફરિયાદોને પગલે પોલીસે આ મેગા ડ્રાઇવ યોજી હોવાનું સામે આવ્યું છે.
રિપોર્ટ મુજબ, શહેરના સી.જી. રોડ અને આસપાસના વિસ્તારોમાં મોડી રાત્રે રોમિયોગીરી કરતા તત્વો અને નિયમભંગ કરનારાઓનો ત્રાસ વધી રહ્યો અંગે ફરિયાદો મળી રહી હતી. ખાસ કરીને રાત્રિના સમયે ખરીદી કે ફરવા માટે નીકળતી મહિલાઓ, યુવતીઓ અને સિનિયર સિટિઝન્સની સુરક્ષાને ધ્યાનમાં રાખીને નવરંગપુરા પોલીસ તથા મહિલા SHE ટીમ દ્વારા સંયુક્ત ચેકિંગ હાથ ધરાયું હતું. પોલીસ ટીમોએ વાહનોના દસ્તાવેજો, નંબર પ્લેટ અને વાહનોમાં કરવામાં આવેલા ફેરફારોની તપાસ કરી હતી. લાયસન્સ વગર વાહન ચલાવનારા, નિયમ વિરુદ્ધ ફેન્સી નંબર પ્લેટ લગાવનારા તથા મોડિફાઇડ સાઇલેન્સરથી વધુ અવાજ કરનારા વાહનચાલકો સામે કાર્યવાહી કરવામાં આવી હતી.
આ મેગા ડ્રાઇવ દરમિયાન પોલીસને મોટી સંખ્યામાં નિયમભંગ કરતા વાહનો મળી આવ્યા હતા. માત્ર છ કલાકના સમયગાળામાં કુલ 106 વાહનો ડિટેઇન કરવામાં આવ્યા હતા. જેમાં નંબર પ્લેટ વગરના 21 વાહનોનો પણ સમાવેશ થાય છે. આ ઉપરાંત ફેન્સી નંબર પ્લેટ ધરાવતા વાહનો સામે પણ કાર્યવાહી કરવામાં આવી હતી. પોલીસની કાર્યવાહીમાં સામાન્ય ટુ-વ્હીલર્સની સાથે લક્ઝુરિયસ ફોર-વ્હીલર્સ પણ ઝપટે ચડ્યા હતા. થાર, કિયા અને સ્કોર્પિયો જેવી ગાડીઓ પણ ડિટેઇન કરવામાં આવી હોવાનું સામે આવ્યું છે. આ કાર્યવાહીથી મોડી રાત્રે સી.જી. રોડ પર વાહન લઈને ફરતા નિયમભંગ કરનારાઓમાં ભારે ફફડાટ જોવા મળ્યો હતો.
પોલીસની મેગા ડ્રાઇવમાં ખાસ કરીને મોડિફાઇડ સાઇલેન્સર અને નંબર પ્લેટના નિયમો પર ધ્યાન કેન્દ્રિત કરવામાં આવ્યું હતું. વાહનમાં ફેરફાર કરીને ધમાકેદાર અવાજ કરતા સાઇલેન્સર લગાવનારા તેમજ કાયદા વિરુદ્ધની ફેન્સી નંબર પ્લેટનો ઉપયોગ કરનારા સામે કાર્યવાહી કરવામાં આવી હતી. ઝોન-1ના DCP ડૉ. હર્ષદ પટેલે જણાવ્યું હતું કે શહેરમાં શાંતિ અને સુરક્ષાનું વાતાવરણ જળવાઈ રહે તે પોલીસની પ્રાથમિકતા છે. સી.જી. રોડ જેવા વ્યસ્ત વિસ્તારમાં મહિલાઓ અને સિનિયર સિટિઝન્સ મોડી રાત્રે પણ નિર્ભયપણે અવરજવર કરી શકે તે માટે ખાસ ડ્રાઇવ હાથ ધરવામાં આવી હતી. નિયમોનું ઉલ્લંઘન કરનારા સામે આવી કાર્યવાહી આગામી દિવસોમાં પણ ચાલુ રાખવામાં આવશે તેમ જણાવાયું છે.
બીજી તરફ આજે સવારથી જ પોલીસ સામે પોલીસે જ તપાસ શરૂ કરી છે. પોલીસની પ્લેટ વાળા અને બ્લેક ફિલ્મ વાળા કાચ ધરાવતી પોલીસની ગાડીઓ સામે પણ કાર્યવાહી કરવામાં આવી છે. આ દરમિયાન ગાંધીનગરમાં ખુદ રાજ્યના પોલીસ વડાની કચેરી પાસે જ નિયમોનો ઉલાળિયો જોવા મળ્યો હતો. કેટલીક ગાડીઓમાં બ્લેક ફિલ્મ લગાવેલી હતી. તો કેટલીક ગાડીઓમાં પોલીસ લખેલી પ્લેટ પણ જોવા મળી હતી. પોલીસ વડા દ્વારા જ નક્કી કરવામાં આવેલા નિયમોનો જાણે પોલીસ કર્મચારીઓ જ ઉલાળિયો કરતા હોય તેવા દ્રશ્યો સામે આવ્યા હતાં.