અમદાવાદ : સોલા બ્રિજ પર અકસ્માતના કેસ મામલે પોલીસે મર્સિડીઝ કાર ચાલકની ધરપકડ કરી છે. આરોપીની પ્રાથમિક તપાસ કરવામાં આવતા તે પોલીસ પુત્ર હોવાનું ખુલવા પામ્યું છે. મહત્વનું છે કે આરોપી હિટાચી મશીનનો ધંધો કરે છે અને ધોળકાનો રહેવાસી છે. તેના પિતા અમદાવાદ ગ્રામ્ય પોલીસમાં ફરજ બજાવતા હોવાનું સામે આવ્યું છે. ઉલ્લેખનીય છે કે આરોપી જ્યારે નાસ્તા માટે જતો હતો. આ દરમ્યાન હેબતપુર બ્રિજ ઉપર થયેલા અકસ્માત જોવા ઉમટેલા ટોળાને તથા એક્ટિવાએ અડફેટે લીધુ હતું અને ભાગી છૂટ્યો હતો. પોલીસ તપાસની કાર્યવાહી સામે સવાલો ઉઠી રહ્યા છે, ત્યારે આરોપી યુવકની પોલીસે ધરપકડ કરીને આગળની કાર્યવાહી હાથ ધરી છે.
પ્રાપ્ત રિપોર્ટ મુજબ, અમદાવાદના સોલા બ્રિજ પર પેલેડિયમ મોલ પાસે આવેલા ઓવરબ્રિજ પર 14 મે રાત્રિના સમયે વેજલપુર વિસ્તારમાં રહેતા રાહુલ ભાટિયા નામનો યુવક પોતાના વાહન પર જઈ રહ્યો હતો ત્યારે અચાનક એક ફુલ સ્પીડમાં મર્સિડીઝ કાર ત્યાં આવી અને તેણે રાહુલના વાહનને અડફેટે લેતાં તે ફંગોળાયો હતો અને તેને ગંભીર ઈજા થઈ હતી. એટલું જ નહીં, અકસ્માત બાદ ઈજા પામનારી વ્યક્તિને મદદ કરવાને બદલે કારચાલક ત્યાંથી ફરાર થઈ ગયો હતો.
પોલીસ તપાસમાં 14 મે 2025ના રોજ મર્સિડીઝ કારથી હિટ એન્ડ રન કરનારો પોલીસ કોન્સ્ટેબલનો પુત્ર હોવાનું બહાર આવ્યું છે. આ અકસ્માતમાં રાહુલ ભાટીયા નામના ફૂટબોલરને ગંભીર ઈજા પહોંચી હતી. હાલમાં તે ICUમાં સારવાર હેઠળ છે. હીટ એન્ડ રન કરનારી આ મર્સિડીઝ કોઈ બીજાની નહીં, એટલે કે પૈસાદાર ઘરના વ્યક્તિની નહીં, પણ એક કોન્સ્ટેબલના દીકરા વિજય વાઘજીભાઈ રબારીની હોવાનું સામે આવ્યું છે. આ પોલીસ પુત્રને હવે આઠ દિવસની ધીમી તપાસ બાદ ટ્રાફિક- પોલીસે પકડ્યો છે.
પોલીસ એક સપ્તાહ સુધી આ સમગ્ર કેસની તપાસ કરી હોવાનો દાવો કરી રહી છે. બીજી તરફ ઇજાગ્રસ્ત હોસ્પિટલમાં સારવાર લઈ રહ્યો છે ત્યારે આરોપી કોણ છે એ શોધવામાં જ પોલીસને આટલો સમય લાગી ગયો છે.સૂત્રો પાસેથી મળતી માહિતી પ્રમાણે, આરોપીનું નામ વિજય વાઘજીભાઈ રબારી હોવાનું સામે આવ્યું છે અને વિજયના પિતા મૂળ અમદાવાદ જિલ્લા પોલીસમાં પોલીસ કર્મચારી હોવાનું પણ જાણવા મળી રહ્યું છે.