ગાંધીનગર : રાજ્યના મુખ્યમંત્રી ભૂપેન્દ્ર પટેલના નેતૃત્વ અને રાજ્યના ગૃહ રાજ્યમંત્રી હર્ષ સંઘવીના માર્ગદર્શન હેઠળ રાજ્ય પોલીસ વડા વિકાસ સહાયે ગુજરાત પોલીસની એક અનોખી અને અદ્યતન પહેલ – GP-SMASH (ગુજરાત પોલીસ – સોશિયલ મીડિયા મોનિટરીંગ, અવેરનેસ એન્ડ સિસ્ટમેટિક હેન્ડલિંગ)નો 1 માર્ચ 2025થી આરંભ કર્યો છે.
GP-SMASH શું છે?
GP-SMASH એ ગુજરાત પોલીસનો એક સોશિયલ મીડિયા મોનિટરિંગ અને અવેરનેસ પ્રોજેક્ટ છે, જેનો મુખ્ય ઉદ્દેશ નાગરિકો દ્વારા સોશિયલ મીડિયા પર રજૂ થતી ફરિયાદો, ચિંતાઓ અને સૂચનોને સંવેદનશીલ રીતે સાંભળી, તેને યોગ્ય અધિકારીઓ સુધી ઝડપથી પહોંચાડીને સમયસર ઉકેલ લાવવાનો છે. આ પ્રોજેક્ટ હેઠળ રાજ્ય સ્તરે એક ડેડિકેટેડ ટીમ 24*7 સોશિયલ મીડિયા પ્લેટફોર્મ પર પોલીસ વિભાગને લગતી પોસ્ટ્સ, ગુનાઓ અને સારા કાર્યોનું રિયલ-ટાઈમ મોનિટરિંગ કરે છે.
કઈ રીતે કામ કરે છે GP-SMASH?
ગુજરાત પોલીસના X હેન્ડલ પર ટેગ કરાયેલી પોસ્ટ્સને ગણતરીની મિનિટોમાં જવાબ આપવામાં આવે છે. આ પોસ્ટ્સ લો એન્ડ ઓર્ડર, ટ્રાફિક, પ્રોહિબિશન, સાયબર ફ્રોડ કે સરકારી અધિકારીઓના દુર્વ્યવહાર જેવા મુદ્દાઓ સાથે સંકળાયેલી હોય, તો તેને તાત્કાલિક સંબંધિત જિલ્લા, રેન્જ કે એકમના વડાને ટેગ કરી, તપાસ અને કાર્યવાહી માટે સૂચના આપવામાં આવે છે. આ ઉપરાંત, સંબંધિત અધિકારીઓ દ્વારા કરવામાં આવેલી કાર્યવાહીની વિગતો પણ તે જ પોસ્ટ પર કોમેન્ટ દ્વારા અપડેટ કરવામાં આવે છે. આ પ્રક્રિયાનું રાજ્ય, રેન્જ અને જિલ્લા સ્તરે સતત મોનિટરિંગ કરવામાં આવે છે, જેથી ઝડપી અને પારદર્શક નિરાકરણ સુનિશ્ચિત થાય.
ત્રણ મહિનામાં 310 ફરિયાદો ઉકેલાઈ
લો એન્ડ ઓર્ડર ડીઆઈજી દીપક મેઘાણીના નેતૃત્વમાં GP-SMASH ટીમે 1લી માર્ચથી 31મી મે, 2025 દરમિયાન 335 નાગરિક રજૂઆતોને સંબંધિત અધિકારીઓ સુધી પહોંચાડી હતી. આમાંથી 310થી વધુ પ્રશ્નોનું ગણતરીના કલાકોમાં નિરાકરણ કરવામાં આવ્યું છે. ગુજરાત પોલીસને આ ઝડપી કામગીરી માટે ફરિયાદી પરથી સકારાત્મક ફીડબેક મળ્યા છે, જે નાગરિકોના વિશ્વાસ અને સુરક્ષાની ભાવનામાં વધારો દર્શાવે છે.
GP-SMASH માત્ર ડિજિટલ મોનિટરિંગ પૂરતું મર્યાદિત નથી, પરંતુ એક જવાબદાર અને ટેકનોલોજીથી સંલગ્ન પોલીસ વ્યવસ્થા તરફનું મજબૂત પગલું છે. GP-SMASH પહેલ થકી ગુજરાત પોલીસ નાગરિકોની નજીક લાવી, “પોલીસ માત્ર એક ક્લિક દૂર” હોવાનો અહેસાસ કરાવ્યો છે. સોશિયલ મીડિયા પર રજૂ થતા પ્રશ્નો હવે માત્ર “ટ્રેન્ડ” નથી રહેતા, તેના પર તાત્કાલિક પગલાં લેવામાં આવે છે. તમે પણ ગુજરાત પોલીસના ઓફિશિયલ X એકાઉન્ટ @GujaratPolice ઉપર ટેગ કરીને તમારી સમસ્યાની રજૂઆત કરી શકો છો.