અમદાવાદ : જો તમે તમારી ઓફિસે કે ઘરે સીસીટીવી કેમેરા લગાવો છો, તો જરા ચેતી જજો, કારણ કે કેમેરા લગાવનાર વ્યક્તિ તમારા સીસીટીવીનો આઈડી અને પાસવર્ડ પોતાની પાસે રાખી તમને જ બ્લેકમેઈલ કરી શકે છે અને આ વાતનો કડવો અનુભવ અમદાવાદના પાલડી વિસ્તારમાં રહેતા એક ડોક્ટરને થયો છે. જેમાં આરોપીએ ડોક્ટરના બોડી મસાજનું રેકોર્ડિંગ કરી તેમને મોકલી બ્લેકમેઈલ કરી રૂપિયા પડાવ્યા છે. ત્યારે હાલ આ મામલે પાલડી પોલીસે ગુનો દાખલ કરી આરોપીની ધરપકડ કરી છે.
વિગતે વાત કરીએ તો, અમદાવાદ શહેરના પાલડી વિસ્તારમાં રહેતા આધેડ વયના ડોક્ટરને થોડા દિવસો પહેલા વોટ્સએપ પર અજાણ્યા નંબર પરથી એક વીડિયો આવ્યો હતો. આ વીડિયોમાં ક્લિનિકના ફૂટેજ હતા. જેમાં ડોક્ટર બોડી મસાજ કરાવતા હતા. વીડિયો મોકલનારે આવી અનેક ક્લિપ હોવાનું કહીને ડોક્ટરને ડરાવ્યા હતા. વીડિયો મોકલનારે આખુ ફોલ્ડર બનાવ્યુ છે અને તે ફૂટેજ ડિલીટ કરવાના 35 હજાર રૂપિયાની માંગણી કરી હતી.ડોક્ટરે ગભરાઈને ઓનલાઈન પાંચ હજાર મોકલી દીધા હતા.
જોકે બાદમાં આરોપીઓએ બ્લેકમેલ કરવાનું યથાવત રાખતા ડોક્ટરે પાલડી પોલીસ સ્ટેશનમાં ફરિયાદ નોંધાવી છે. જે અંગે પાલડી પોલીસે ગુનો નોંધી અબ્દુલ વહાબ સૈયદની ધરપકડ કરી છે. પાલડી પોલીસે આરોપી અબ્દુલની ધરપકડ કરી પૂછપરછ કરતા સામે આવ્યું કે, ‘તે અગાઉ અમદાવાદમાં સીસીટીવી કેમેરા લગાવવાનું કામ કરતો હતો. તે સમયે તેણે ડોક્ટરના ક્લિનિકમાં સીસીટીવી લગાવ્યા હતા.’
આટલું જ નહીં, આરોપીના દીકરાની તબિયત બગડતા તેને સારવાર માટે રૂપિયાની જરૂર હોવાથી તેણે મસાજ કરાવતા સીસીટીવી ફૂટેજ મોકલી ડોક્ટરને બ્લેકમેઈલ કર્યો હોવાનું પોલીસની પ્રાથમિક તપાસમાં ખુલ્યું છે. જો રૂપિયા ન આપે તો તેના મસાજના સીસીટીવી વાયરલ કરવાની ધમકી આપી હતી તેણે આ કાંડ કર્યો છે. જેથી કંટાળી ડોક્ટરે ફરિયાદ નોંધાવતા પોલીસે કાર્યવાહી શરૂ કરી છે.