અમદાવાદ : દિન પ્રતિદિન શહેરમાં હાઇરાઇઝ બિલ્ડીંગો બની રહી છે અને મકાનો મળવા હવે ખૂબ મોંઘા થઈ રહ્યા છે ત્યારે આર્થિક રીતે નબળા લોકોને ઘરનું ઘર મળી રહે તેના માટે સરકાર દ્વારા આવાસ યોજનાના મકાનો બનાવવામાં આવી રહ્યા છે.આવાસ યોજના (શહેરી) અંતર્ગત તૈયાર થયેલા અને વિવિધ કારણોસર ખાલી રહેલા કુલ 434 ઈડબલ્યુએસ ફલેટ માટે ફરીથી ડ્રો યોજવાનો નિર્ણય લેવાયો છે, જેના માટે ઓનલાઈન અરજી પ્રક્રિયા શરુ કરી દેવામાં આવી છે.
રિપોર્ટ મુજબ, અમદાવાદ મ્યુનિસિપલ કોર્પોરેશને પાંચ વર્ષ પહેલા પ્રધાનમંત્રી આવાસ યોજના (શહેરી) અંતર્ગત બનાવેલા ફ્લેટમાંથી 434 જેટલા ખાલી રહેલા ફ્લેટનો ફરીથી ડ્રો કરી ફાળવવા માટે અરજીઓ મંગાવવામાં આવી છે. થલતેજ, સોલા, નિકોલ, ઓઢવ, ગોતા, અસલાલી, ચાંદખેડા અને મકરબામાં ઓછી આવક ધરાવનારા લોકો માટે EWS આવાસ યોજનાના ફ્લેટોને મેન્ટેનન્સ સાથે રૂ. 3.30 લાખમાં આપવામાં આવશે. અમદાવાદ મ્યુનિસિપલ કોર્પોરેશનની વેબસાઈટ પર ઓનલાઇન અરજી કરી શકાશે.
આ સરકારી આવાસોનું બાંધકામ અને સુવિધાઓ કોઈ ખાનગી ફ્લેટથી કમ નથી:
ફ્લેટની સાઈઝ: 28 ચોરસ મીટર કાર્પેટ એરિયા (33 થી 35 ચોરસ મીટર બિલ્ટઅપ એરિયા) ધરાવતા ફ્લેટમાં એક ડ્રોઈંગ રૂમ, બેડરૂમ, કિચન અને કોમન ટોઈલેટની વ્યવસ્થા છે.
કોમન સુવિધાઓ: દરેક બ્લોકમાં લિફ્ટ, વિશાળ પાર્કિંગ, ફાયર સેફ્ટી, ગ્રીન એરિયા, બાળકો માટે ગાર્ડન અને આંગણવાડીની સુવિધા અપાઈ છે. ઉપરાંત, જીવનજરૂરી ચીજવસ્તુઓ માટે મોટાભાગની સ્કીમની બહાર શોપિંગ સેન્ટર (દુકાનો) પણ આવેલી છે.
અરજી કરવાની તારીખ, ડિપોઝિટ અને હપ્તાની સરળ સમજૂતી
ઈચ્છુક અરજદારો 20 નવેમ્બરથી 3 જાન્યુઆરી, 2027 સુધી AMCની સત્તાવાર વેબસાઈટ (https://housingapplicationform.ahmedabadcity.gov.in/) પર ઓનલાઈન ફોર્મ ભરી શકશે.
ડિપોઝિટ અને પેમેન્ટ પ્લાન: ફોર્મ ભરતી વખતે રૂ. 7,500 ડિપોઝિટ ભરવાની રહેશે. ડ્રોમાં નામ લાગ્યા બાદ 3 મહિનામાં મકાનની કુલ કિંમતના 20% રકમ (ડિપોઝિટ બાદ કરીને) ભરવાની રહેશે. બાકીની 80% રકમ એક વર્ષમાં 10 એકસરખા હપ્તામાં જે-તે બેંકમાં ભરપાઈ કરવાની રહેશે. સંપૂર્ણ રકમ અને મેન્ટેનન્સ ડિપોઝિટ ભર્યા બાદ દસ્તાવેજ કરીને કબજો સોંપાશે.
કોણ અરજી કરી શકે? (પાત્રતા અને શરતો)
આવક મર્યાદા: અરજદારના કુટુંબની (પતિ, પત્ની અને અપરિણીત બાળકો) સંયુક્ત વાર્ષિક આવક રૂ. 3 લાખથી ઓછી હોવી ફરજિયાત છે.
માલિકીની શરત: ભારત દેશમાં અરજદાર કે તેમના પરિવારના કોઈ પણ સભ્યના નામે પાકું મકાન કે જમીનનો પ્લોટ ન હોવો જોઈએ. (પુખ્ત વયનો સભ્ય વૈવાહિક દરજ્જાને ધ્યાને લીધા વિના અરજી કરી શકે છે).
અન્ય યોજનાનો લાભ: અરજદારે અગાઉ PMAY ના ચાર ઘટકો (AHP, BLC, CLSS, ISSR) કે મુખ્યમંત્રી ગૃહ યોજના (MMGY) હેઠળ લાભ લીધેલો ન હોવો જોઈએ, અન્યથા ફાળવણી રદ થશે.
મકાનધારકોને AMCની મોટી તાકીદ
AMC દ્વારા સ્પષ્ટ તાકીદ કરવામાં આવી છે કે મકાનનો કબજો મળ્યાના મહત્તમ 6 મહિનામાં લાભાર્થીએ ત્યાં રહેવા જવું પડશે (વિલંબ થાય તો AMCને આગોતરી જાણ કરવી પડશે). જો સ્થળ તપાસ દરમિયાન મકાન ભાડે આપેલું કે અન્ય કોઈ ત્રાહિત વ્યક્તિ વાપરતી હોવાનું જણાશે, તો પંચનામું કરીને તાત્કાલિક અસરથી ફ્લેટનું પઝેશન પરત ખેંચી લેવાની કડક કાર્યવાહી કરવામાં આવશે.


