અમદાવાદ : અમદાવાદ સહિત રાજ્યના અન્ય વિસ્તારોમાંથી નિર્દોષ મુસાફરોને રિક્ષામાં બેસાડીને લૂંટ ચલાવતી ગેંગનો અમદાવાદ શહેર પોલીસની LCB ઝોન-1ની ટીમે પર્દાફાશ કર્યો છે. રિક્ષામાં પેસેન્જર તરીકે બેસીને અન્ય મુસાફરો સાથે લૂંટ કરતી ગેંગના ત્રણ આરોપીઓને પોલીસે ઝડપી પાડ્યા છે. જ્યારે ગેંગનો એક આરોપી હજુ પોલીસ પકડથી દૂર છે.
રિપોર્ટ મુજબ, અમદાવાદ શહેરમાં LCB ઝોન-1ની ટીમ પેટ્રોલિંગમાં હતી. આ દરમિયાન પોલીસને મળેલી સંયુક્ત બાતમીના આધારે આ ગુનામાં સંડોવાયેલા ત્રણ આરોપીઓની ધરપકડ કરી છે. જેમાં (1) સાકીરહુસેન શેખ ઉર્ફે પેઇન્ટર, (2) રહેમતખાન ઉર્ફે મોસીન મીઠા અને (3) શાહિદખાન કરીમભાઈ બેલીમનો સમાવેશ થાય છે. ત્રણેય આરોપીઓ કડી, મહેસાણા વિસ્તારના રહેવાસી હોવાનું સામે આવ્યું છે. જ્યારે અલીખાન છોટખાન પઠાણ નામનો આરોપી હજુ ફરાર છે, જેને ઝડપી પાડવા પોલીસે તપાસ હાથ ધરી છે.
પોલીસ સૂત્રો મુજબ, પકડાયેલા આરોપીઓ રિક્ષામાં પેસેન્જર તરીકે બેસીને અન્ય મુસાફરોને નિશાન બનાવતા હતા અને તેમની સાથે લૂંટની ઘટનાને અંજામ આપતા હતા. વસ્ત્રાપુર વિસ્તારમાં આશરે 25 દિવસ પહેલાં થયેલી લૂંટના ગુનાનો ભેદ ઉકેલવામાં LCB ઝોન-1ની ટીમને સફળતા મળી છે.
પોલીસ તપાસમાં સામે આવ્યું છે કે, આરોપી શાહિદખાન કરીમભાઈ બેલીમ સામે કડી પોલીસ સ્ટેશનમાં BNSની કલમ 303(2) અને 54 હેઠળ ગુનો નોંધાયેલો છે. જ્યારે ફરાર આરોપી અલીખાન છોટખાન પઠાણ સામે કલોલ, કડી, અડાલજ, નડિયાદ ટાઉન, ચાંદખેડા અને મહેસાણા સહિતનાં પોલીસ સ્ટેશનોમાં ચોરી, લૂંટ સહિતના વિવિધ ગુનાઓ નોંધાયેલા હોવાનું જણાવાયું છે.
આ શાતિર ત્રિપુટીએ ભૂતકાળમાં અન્ય કેટલા મુસાફરોને આ જ મોડસ ઓપરેન્ડીથી લૂંટ્યા છે તે દિશામાં પોલીસે ઊંડાણપૂર્વક તપાસ શરૂ કરી છે.અમદાવાદ શહેરમાં મુસાફરોને નિશાન બનાવી લૂંટ ચલાવતા તત્ત્વો સામે પોલીસની આ કાર્યવાહી મહત્વપૂર્ણ માનવામાં આવી રહી છે.


