અમદાવાદ : મુંબઈ-અમદાવાદ બુલેટ ટ્રેન માટે અમદાવાદીઓ માટે હજુ રાહ જોવી પડશે, રેલવે મંત્રી અશ્વિની વૈષ્ણવે બુલેટ ટ્રેનના પ્રથમ રૂટનું ટાઈમટેબલ જાહેર કરી દીધું છે. રેલવે મંત્રીના જણાવ્યા અનુસાર, દેશની પ્રથમ બુલેટ ટ્રેન 2027ના છેલ્લા ક્વાર્ટરમાં (ઓક્ટોબરથી ડિસેમ્બર) શરૂ થઈ જશે. આ હાઈ-સ્પીડ રેલ કોરિડોરનો પ્રથમ સેક્શન ગુજરાતના સુરતથી વાપી વચ્ચે ખુલ્લો મૂકવામાં આવશે.ત્યારબાદ મુંબઈ-અમદાવાદ કોરિડોરને તબક્કાવાર શરૂ કરવામાં આવશે.
રિપોર્ટ મુજબ, પ્રોજેક્ટની અત્યાર સુધીની પ્રગતિ રેલવે મંત્રી અશ્વિની વૈષ્ણવે સોશિયલ મીડિયા પોસ્ટ દ્વારા જણાવ્યું કે, અત્યાર સુધીમાં 456 કિલોમીટર સુધી પિલરનું કામ અને 371 કિલોમીટર વાયડક્ટનું બાંધકામ પૂર્ણ થયું છે. 299 કિલોમીટરના વિસ્તારમાં 6 લાખ નોઈઝ બેરિયર લગાવવામાં આવ્યા છે. જ્યારે 206 કિલોમીટરના વાયડક્ટ પર 9,300 OHE માસ્ટ સ્થાપિત કરાયા છે. આ ઉપરાંત આઠ સ્ટેશનોનું સિવિલ બાંધકામ પૂર્ણ થયું છે અને હાલમાં ફિનિશિંગનું કામ ચાલી રહ્યું છે. સાબરમતી, સુરત અને થાણેના ત્રણેય રોલિંગ સ્ટોક ડિપોનું કામ પણ ઝડપથી આગળ વધી રહ્યું છે.
બુલેટ ટ્રેન પ્રોજેક્ટમાં મહારાષ્ટ્રમાં કુલ 21 કિલોમીટર લાંબી સુરંગ બનાવવામાં આવી રહી છે. જેમાંથી 7 કિલોમીટરનો હિસ્સો દરિયાની નીચે થાણે ક્રીકમાંથી પસાર થશે. આ ટનલના નિર્માણ માટે જુલાઈ 2026માં વિક્રોલી અને સાવલી ખાતેથી બે ટનલ બોરિંગ મશીનો તૈનાત કરવામાં આવ્યાં છે.અંડર-સી ટનલ બનાવવા માટે ઉપયોગમાં લેવાતી મશીનો વિશાળ કદની છે. દરેક મશીન ચાર માળની ઇમારત જેટલી ઊંચી અને 3,000 ટનથી વધુ વજન ધરાવે છે. તેનું વજન આશરે 500 એશિયન હાથીઓ જેટલું છે. આ મશીનોની લંબાઈ 96 મીટર છે, જે લગભગ પાંચ ક્રિકેટ પિચ જેટલી થાય છે.
રેલવે મંત્રીના જણાવ્યા અનુસાર, ICF અને BEML દ્વારા સ્વદેશી B28 ટ્રેનસેટ તૈયાર કરવામાં આવી રહ્યા છે. આ ટ્રેન 280 કિલોમીટર પ્રતિ કલાકની ઝડપ માટે ડિઝાઇન કરવામાં આવી છે. તેનો પ્રથમ બોડી ફ્રેમ તૈયાર થઈ ગયો છે અને હાલ સ્ટ્રક્ચરલ ટેસ્ટિંગ ચાલી રહ્યું છે. વર્ષ 2027ના મધ્ય સુધીમાં ટ્રેક ટ્રાયલ શરૂ થવાની અપેક્ષા છે. ત્યારબાદ 350 કિલોમીટર પ્રતિ કલાકની ઝડપ માટે ડિઝાઇન કરાયેલી B35 ટ્રેન બનાવવાની દિશામાં આગળ વધવામાં આવશે.


