અમદાવાદ : અમદાવાદ શહેરમાં મહિલાઓની સુરક્ષા માટે કાર્યરત પોલીસની ‘શી ટીમ’ વિવાદમાં આવી છે. અમદાવાદના નિકોલ વિસ્તારમાં ગત મોડી રાત્રે ભવાની ચોક નજીક SHE ટીમ સાથે જોડાયેલી એક પોલીસ PCR વાનના ચાલકે સ્ટીયરિંગ પરથી કાબૂ ગુમાવતા વાન સીધી ડિવાઈડર પર ચડી ગઈ હતી. અકસ્માતને પગલે રસ્તા પરથી પસાર થતા લોકોના ટોળા ઉમટી પડ્યા હતા.પોલીસે આ મામલે આઉટસોર્સ ડ્રાઇવર વિરુદ્ધ ગુનો નોંધી તેની ધરપકડ કરી કાયદેસરની કાર્યવાહી હાથ ધરી છે.
પ્રાપ્ત રિપોર્ટ મુજબ, અમદાવાદ શહેરના નિકોલ વિસ્તારમાં આવેલા ભવાની ચોક પાસે રાત્રે 10:00 વાગ્યાની આસપાસ પોલીસની ગાડીના ડ્રાઇવર દ્વારા બેફામપણે ગાડી ચલાવીને ડિવાઇડર ઉપર ચડાવી દેવામાં આવી હતી. ગાડીનો અકસ્માત થતા ત્યાંથી પસાર થતા લોકોના ટોળેટોળા ભેગા થઈ ગયા હતા.ગાડીમાં ડ્રાઇવર બેઠો હતો અને તેમાં તપાસ કરતા એક લાલ કલરના દારૂનું ક્વાર્ટર પણ ગાડીમાંથી મળી આવ્યું હતું.પોલીસની ગાડીમાંથી જ નશાની હાલત જણાતા લોકોમાં ભારે ગુસ્સો જોવા મળ્યો હતો.
ઉશ્કેરાયેલા લોકોએ વાન ચાલકને ઘેરી લીધો હતો અને રોષમાં તેને મેથીપાક ચખાડ્યો હોવાની માહિતી મળી છે. ઘટનાની ગંભીરતા જોતા પોલીસનો ઉચ્ચ કાફલો તાત્કાલિક સ્થળ પર દોડી આવ્યો હતો અને પરિસ્થિતિ પર કાબૂ મેળવ્યો હતો. પ્રાથમિક તપાસમાં બહાર આવ્યું છે કે અકસ્માત સર્જનાર વ્યક્તિ પોલીસનો કાયમી જવાન નથી, પરંતુ આઉટસોર્સિંગ દ્વારા રાખવામાં આવેલો ખાનગી ડ્રાઈવર છે.નિકોલ પોલીસ દ્વારા આ મામલે કાર્યવાહી કરવામાં આવી હતી.