અમદાવાદ : 8 માર્ચ, 2026એ દુનિયાના સૌથી મોટા નરેન્દ્ર મોદી ક્રિકેટ સ્ટેડિયમમાં ભારત અને ન્યૂઝીલેન્ડ વચ્ચે T20 વર્લ્ડ કપની ફાઈનલ મેચ રમાઈ હતી. જેમાં ભારતે ભવ્ય જીત હાસંલ કરી T20 વર્લ્ડ કપ પોતાના નામે કર્યો હતો. ભારતની જીત સાથે જ ગુજરાતમાં ઉત્સાહનો માહોલ છવાઈ ગયો હતો. રાજ્યમાં ઠેર ઠેર લોકો રસ્તા ઉપર ઉતરી આવ્યા હતા.
ભારતે પ્રથમ બેટિંગ કરતા નિર્ધારિત 20 ઓવરમાં સ્કોરબોર્ડ પર 256 રનનો વિશાળ લક્ષ્યાંક મૂક્યો હતો. આટલા મોટા સ્કોરનો પીછો કરવા ઉતરેલી ન્યૂઝીલેન્ડની ટીમ ભારતીય બોલરો સામે લાચાર જણાઈ હતી. ન્યૂઝીલેન્ડની આખી ટીમ માત્ર 159 રનમાં ઓલઆઉટ થઈ ગઈ હતી અને ભારતનો ભવ્ય વિજય થયો હતો.મેચની ખાસિયત એ રહી કે ન્યૂઝીલેન્ડને ઢેર કરવામાં ગુજરાતના ત્રણેય સ્ટાર ખેલાડીઓનો સિંહફાળો રહ્યો.
જસપ્રિત બુમરાહ પોતાની આગવી શૈલીમાં બોલિંગ કરતા બુમરાહે માત્ર થોડા રન આપીને 4 મહત્વની વિકેટ ઝડપી હતી. તેના યોર્કર સામે ન્યૂઝીલેન્ડના ટોપ ઓર્ડર પાસે કોઈ જવાબ નહોતો. અક્ષર પટેલ સ્પિનના જાદુગર અક્ષરે મધ્યમ ઓવરોમાં અંકુશ મેળવીને 2 વિકેટ ઝડપી અને રન ગતિ રોકી દીધી હતી. હાર્દિક પંડ્યા ઓલરાઉન્ડર હાર્દિકે ટીમને બ્રેક-થ્રુ અપાવતા 1 વિકેટ લીધી હતી અને શાનદાર ફિલ્ડિંગનું પ્રદર્શન કર્યું હતું.
અમદાવાદ, વડોદરા અને રાજકોટ સહિતના મહાનગરોમાં ક્રિકેટરસિકોમાં ભારે ઉત્સાહ જોવા મળ્યો હતો. અમદાવાદના સિંધુભવન રોડ, શાસ્ત્રીનગર સહિતના વિસ્તારોમાં લોકો હાથમાં ત્રિરંગા સાથે પોતાના વાહનો પર નીકળી પડ્યા હતા અને ઇન્ડિયા ઇન્ડિયાના નારા લગાવતા જોવા મળ્યા હતા. નરેન્દ્ર મોદી સ્ટેડિયમમાંથી બહાર નીકળતા લોકોએ બુમરાહ બુમરાહ અને ઇન્ડિયા ઇન્ડિયાના નારા લાગ્વા હતા.
વર્લ્ડકપ જીત્યા બાદ કેન્દ્રીય ગૃહ અને સહકારિતા મંત્રી અમિત શાહ ખૂબ જ ખુશ જોવા મળ્યા હતા. મેચ જીતી ગયા બાદ તેઓ ઊભા થઈ અને તાળીઓ પાડી અને જીતની ઉજવણી કરી હતી.નોંધનીય છે કે, ક્રિકેટ નિષ્ણાતોએ જણાવ્યું હતું કે ભારતીય બોલરોએ આજે જે સંયમ અને આક્રમકતા બતાવી છે, તે કાબિલે તારીફ છે. ખાસ કરીને બુમરાહની સ્પેલ હંમેશા યાદ રખાશે.”