મદાવાદ : શહેરના પોશ વિસ્તાર ગણાતા ચાંદખેડામાં ગોદરેજ ગાર્ડન સિટી પાસે PCBની ટીમ દ્વારા જુગારધામ પર દરોડો પાડવામાં આવ્યો છે. આ રેડ ગોદરેજ ગાર્ડન સીટી નજીક સ્થિત સીવી સ્ટુડિયોના બ્લોક Aના ફ્લેટમાં પાડવામાં આવી હતી.રહેણાંક મકાનમાં જુગાર રમાતો હોવાની ચોક્કસ બાતમીના આધારે પોલીસે દરોડો પાડીને મકાન માલિક સહિત કુલ 5 જુગારીઓની ધરપકડ કરી છે.
પ્રાપ્ત રિપોર્ટ મુજબ, PCBની ટીમને બાતમી મળી હતી કે જગતપુર પાસે આવેલા ‘સેવી સ્ટુડિયો’ના બ્લોક-Aના ફ્લેટ નંબર 705માં બહારથી માણસો બોલાવીને જુગાર રમાડવામાં આવે છે. આ બાતમીના આધારે પોલીસે વ્યૂહાત્મક રીતે દરોડો પાડતા મકાન માલિક વિસ્મય પંડ્યા પોતે જ અન્ય ચાર શખ્સો સાથે પત્તા ટીપતા રંગેહાથ ઝડપાઈ ગયો હતો.આ કાર્યવાહી દરમિયાન પોલીસે રોકડ રકમ અને લક્ઝરી કાર સહિત કુલ 25.23 લાખ રૂપિયાનો મુદ્દામાલ કબજે કર્યો છે. ઝડપાયેલા આરોપીઓમાં લોન એજન્ટ, મિસ્ત્રીકામ, ડ્રાઈવિંગ અને કડિયા કામ સાથે સંકળાયેલા લોકોનો સમાવેશ થાય છે.
ઝડપાયેલા મુદ્દામાલની વિગત પોલીસને દરોડા દરમિયાન ઘટનાસ્થળેથી કુલ 63,000 રૂપિયાની રોકડ રકમ મળી આવી હતી. આ ઉપરાંત, જુગારીઓ પાસેથી 5 મોબાઈલ ફોન અને ફ્લેટની નીચે પાર્ક કરેલી 2 ફોર-વ્હીલર ગાડીઓ પણ પોલીસે જપ્ત કરી છે. ગાડીઓની કિંમત સાથે કુલ મુદ્દામાલ 25.23 લાખ રૂપિયા આંકવામાં આવ્યો છે.
ગોદરેજ ગાર્ડન સિટી જેવા શાંત રહેણાંક વિસ્તારમાં ફ્લેટની અંદર ચાલતા આ જુગારધામથી આસપાસના રહીશોમાં પણ ચર્ચા જાગી છે. પોલીસે તમામ આરોપીઓ વિરુદ્ધ જુગારધારા હેઠળ ગુનો નોંધી કાયદેસરની કાર્યવાહી હાથ ધરી છે.
ધરપકડ કરાયેલા આરોપીઓ:
વિસ્મય તારેશભાઇ પંડયા (મકાન માલિક, લોન એજન્ટ)
પ્રકાશભાઇ ડાહ્યાભાઇ પંચાલ (ન્યુ રાણીપ)
રમેશભાઇ ઘનશ્યામભાઇ દલવાડી (સાબરમતી)
ભાવીન પ્રવીણભાઇ પટેલ (ન્યુ રાણીપ)
વાલજીભાઇ રામજીભાઇ ટાંક (ન્યુ ગોતા)