અમદાવાદ : ‘જનસેવા હી પ્રભુસેવા’નું સૂત્ર ધરાવતી ગુજરાત પોલીસના એક અધિકારીએ અમદાવાદમાં ખાખીની આબરૂના ધજાગરા ઉડાવ્યા છે. બોપલ પોલીસ સ્ટેશનમાં ફરિયાદ કરવા ગયેલા એક કંપનીના માલિક અને તેના મિત્રો સાથે PSI જયેશ કાલોતરાનો કથિત ગેરવર્તણૂકનો મામલો હવે ઉચ્ચ પોલીસ અધિકારી સુધી પહોંચ્યો છે. બોપલ પોલીસ સ્ટેશનમાં ફરિયાદ નોંધાવવા ગયેલા એક યુવકને PSI ના કડવા અનુભવનો સામનો કરવો પડતા, તેણે આ મામલે અમદાવાદ ગ્રામ્ય એસપી (SP) ને લેખિત ફરિયાદ કરી છે.
પ્રાપ્ત રિપોર્ટ મુજબ, અમદાવાદના બોપલ પોલીસ સ્ટેશનના એક PSI દ્વારા અરજદારના મિત્ર સાથે કરવામાં આવેલી કથિત ગેરવર્તણૂકનો મામલો હવે ઉચ્ચ પોલીસ અધિકારી સુધી પહોંચ્યો છે. બોપલ પોલીસ સ્ટેશનમાં ફરિયાદ નોંધાવવા ગયેલા એક યુવકને PSI ના કડવા અનુભવનો સામનો કરવો પડતા, તેણે આ મામલે અમદાવાદ ગ્રામ્ય એસપી (SP) ને લેખિત ફરિયાદ કરી છે.
રિપોર્ટ મુજબ, એક યુવક તેના મિત્ર સાથે બોપલ પોલીસ સ્ટેશનમાં ફરિયાદ નોંધાવવા માટે ગયો હતો. આ યુવકની તાજેતરમાં જ હિપ સર્જરી (થાપાનું ઓપરેશન) થયેલી હોવાથી તેને ઉભા રહેવામાં તકલીફ પડતી હતી. આ શારીરિક મજબૂરીના કારણે તે પોતાની ગાડીના બોનેટ પર ટેકો લઈને બેઠો હતો. આ જોઈને ત્યાં ફરજ પરના PSI જયેશ કાલોતરા ઉશ્કેરાઈ ગયા હતા.
અરજદારનો આક્ષેપ છે કે PSI જયેશ કાલોતરાએ તેને જોઈને અપમાનજનક શબ્દો વાપર્યા હતા. PSI એ કથિત રીતે કહ્યું હતું કે, “નીકળ લુખ્ખા, આ મારું પોલીસ સ્ટેશન છે અને અહીં મારું જ ચાલશે.” કાયદાના રક્ષક ગણાતા પોલીસ અધિકારી દ્વારા આવા શબ્દપ્રયોગ અને તોછડા વર્તનથી યુવક અત્યંત ક્ષોભજનક સ્થિતિમાં મુકાઈ ગયો હતો.
પોલીસ સ્ટેશનમાં ન્યાય મેળવવા ગયેલા યુવકને બદલે અપમાન મળતા તેણે હવે અમદાવાદ ગ્રામ્ય એસપીનો દરવાજો ખટખટાવ્યો છે. અરજદારે માંગ કરી છે કે આ સમગ્ર ઘટનાની તપાસ કોઈ સિનિયર પોલીસ અધિકારી દ્વારા કરવામાં આવે અને PSI વિરુદ્ધ કડક ખાતાકીય કાર્યવાહી કરવામાં આવે. પોલીસ સ્ટેશનમાં આવતા અરજદારો સાથે પોલીસનું વર્તન કેવું હોવું જોઈએ, તે બાબતે ફરી એકવાર આ ઘટનાએ સવાલો ઉભા કર્યા છે.