અમદાવાદ : સોલા હાઈકોર્ટ પોલીસ સ્ટેશને વાહન ચોરીના ગુનાઓ સામે કાર્યવાહી કરતાં એક બાઈક ચોરને ચોરાઉ મોટરસાયકલ સાથે ઝડપી પાડ્યો છે. પોલીસે આરોપીની ધરપકડ કરી જેલના સળિયા પાછળ ધકેલી સોલા વિસ્તારમાં નોંધાયેલા બાઈક ચોરીના ગુનાનો ભેદ ઉકેલી કાઢ્યો છે.
રિપોર્ટ મુજબ, સોલા હાઈકોર્ટ પોલીસ સ્ટેશનના પીઆઈ કે.એન. ભુકણની સૂચના મુજબ પોલીસ સ્ટાફ પેટ્રોલિંગમાં હતો. દરમિયાન પોલીસને ચોક્કસ બાતમી મળતા આર.સી. ટેકનિકલ રોડ પર શ્રીરામ ભાજીપાઉ સામે રોડ પરથી એક શંકાસ્પદ વ્યક્તિને રોકી તપાસ કરવામાં આવી હતી.તપાસ દરમિયાન તેની પાસેથી હોન્ડા કંપનીનું એક્ટિવા પ્રકારનું મોટરસાયકલ નંબર GJ-12-BK-4568 મળી આવ્યું હતું, જે અગાઉ ચોરી થયેલું હોવાનું બહાર આવ્યું હતું. પોલીસે આરોપી રમજાન ઉર્ફે અરમાન ઉર્ફે પડુી ઈમામબક્ષ મન્સુરી (ઉં.વ. 29), રહે. જુહાપુરા, અમદાવાદને ઝડપી પાડ્યો હતો.
પ્રાથમિક તપાસમાં જાણવા મળ્યું કે આરોપીએ તા. 8 મે થી 9 મે 2026 દરમિયાન કારગિલ AMTS બસ સ્ટેન્ડ સામે સોલા એલિવેટેડ બ્રિજ નીચે પાર્ક કરાયેલ બાઈકની ચોરી કરી હતી. ચોરાયેલ વાહનની કિંમત અંદાજે રૂ.12 હજાર હોવાનું પોલીસે જણાવ્યું છે.પોલીસ હાલ આરોપીની વધુ પૂછપરછ કરી રહી છે કે તે અન્ય કોઈ વાહન ચોરીના ગુનાઓમાં સંડોવાયેલો છે કે કેમ ?.