અમદાવાદ : અમદાવાદ મ્યુનિસિપલ કોર્પોરેશન (AMC) ની સ્ટેન્ડિંગ કમિટીની બેઠકમાં આગામી દિવાળી તહેવારની વ્યવસ્થા અને સુરક્ષા અંગે ચર્ચા કરી મહત્વપૂર્ણ નિર્ણય લેવામાં આવ્યા છે. આ અંગે સ્ટેન્ડિંગ કમિટી ચેરમેન કમલેશ પટેલે માહિતી આપતા કહ્યું કે, દિવાળીના તહેવાર દરમિયાન નાગરિકોની સુરક્ષા માટે ફાયર બ્રિગેડ તથા હોસ્પિટલ સ્ટાફને સ્ટેન્ડબાય પર રહેવાનો આદેશ કરવામાં આવ્યો છે.
રિપોર્ટ મુજબ, AMC ચેરમેન કમલેશભાઇ પટેલે જણાવ્યું કે, દિવાળીના તહેવાર દરમિયાન આગની સંભવિત ઘટનાઓને ધ્યાનમાં રાખીને ફાયર બ્રિગેડ વિભાગને એલર્ટ મોડ પર રાખવાનો નિર્ણય કરવામાં આવ્યો છે. આ સમયગાળા દરમિયાન ફાયર બ્રિગેડના તમામ કર્મચારીઓને સ્ટેન્ડબાય રહેવા સૂચના આપવામાં આવી છે, જેથી કોઈપણ સ્થળે આગની ઘટના બને તો તાત્કાલિક કાર્યવાહી કરી શકાય. આ ઉપરાંત, કોઈ અનિચ્છનીય ઘટના બને અને નાગરિકોને તાત્કાલિક તબીબી સારવારની જરૂરિયાત ઊભી થાય તો તેનો સામનો કરવા માટે મ્યુનિસિપલ હોસ્પિટલના સ્ટાફને પણ સ્ટેન્ડબાય રાખવાનો નિર્ણય કરવામાં આવ્યો છે.
દિવાળીના પવિત્ર તહેવારને ધ્યાનમાં રાખીને શહેરમાં સ્વચ્છતા અને અગ્નિ સુરક્ષા માટે પણ સ્ટેન્ડિંગ કમિટીની બેઠકમાં ખાસ નિર્દેશ આપવામાં આવ્યા છે. તહેવારોમાં રસ્તાઓ પર લોકો ફટાકડા ફોડતા હોવાથી ફટાકડાનો કચરો એકત્ર થાય છે, જેને દૂર કરવા માટે રાત્રિના સમયે જ કચરાની સફાઈ કરીને રસ્તાઓ સ્વચ્છ રાખવાની વ્યવસ્થા કરવામાં આવશે.
તેમજ કોઈ પણ અનિચ્છનીય બનાવ કે તબીબી કટોકટી વખતે નાગરિકોને તાત્કાલિક સારવાર મળી રહે તે માટે અમદાવાદ મ્યુનિસિપલ હોસ્પિટલના સ્ટાફને પણ સ્ટેન્ડબાય પર રાખવાનો નિર્ણય કરવામાં આવ્યો છે.