અમદાવાદ : કહેવાય છે કે માતા પોતાના સંતાન માટે કંઈ પણ કરી શકે છે, પરંતુ અમદાવાદમાં એક માતાએ પોતાના પુત્રનું ભવિષ્ય બચાવવા માટે ગુનાનો રસ્તો પસંદ કર્યો. માણેકચોકના જાણીતા જ્વેલર્સમાં ગ્રાહક બનીને આવેલી મહિલાએ નજર ચૂકવી લાખોના સોનાના દાગીનાની ચોરી કરી હતી. જોકે, ખાડિયા પોલીસે CCTV ફૂટેજના આધારે ગણતરીના કલાકોમાં જ મહિલાની ધરપકડ કરી બે ગુનાનો ભેદ ઉકેલી નાખ્યો છે.
રિપોર્ટ મુજબ, આ ઘટના અંગે સેટેલાઈટ વિસ્તારમાં રહેતા અને ભાગીદારીમાં માણેકચોકમાં જ્વેલર્સ માલિકે ફરિયાદ નોંધાવી છે. ફરિયાદીની માયશા જ્વેલ્સ નામની સોના-ચાંદીના દાગીનાની દુકાનમાં રોજની જેમ તેઓ દુકાને હાજર હતા, ત્યારે એક અજાણી મહિલાએ દુકાનમાં સેલ્સમેનને વાતોમાં ભોળવીને સોનાની બંગડીઓની ચોરી લીધી હતી.આ સમગ્ર ઘટના સીસીટીવીમાં કેદ થઈ ગઈ હતી, જેના આધારે ખાડિયા પોલીસે ગીતા મંદિર નજીકથી તેની ધરપકડ કરી છે.
પોલીસ પૂછપરછમાં ચોંકાવનારો ખુલાસો થયો છે કે, મહિલાનો પતિ સાથે છૂટાછેડાનો કેસ ચાલી રહ્યો છે અને તેનો પુત્ર ધોરણ 9 માં અભ્યાસ કરે છે. પુત્રની સ્કૂલ અને હોસ્ટેલની ફી ન ભરાતા તેને કાઢી મૂકવાની નોબત આવી હતી. આ આર્થિક સંકળામણ દૂર કરવા અને પુત્રની ફી ભરવા માટે તેણે ચોરી કરવાનું નક્કી કર્યું હતું. એટલું જ નહીં, તેણે કાગડાપીઠ વિસ્તારમાં આવેલા ‘કલ્યાણી ગોલ્ડ પેલેસ’માં પણ રૂ. અઢી લાખની બંગડીઓની ચોરી કરી હોવાની કબૂલાત કરી છે.