અમદાવાદ : અમદાવાદમાં લોકલ ક્રાઇમ બ્રાન્ચ (LCB) ઝોન-1 ની ટીમને મોટી સફળતા મળી છે. નવરંગપુરા પોલીસ સ્ટેશન વિસ્તારમાંથી ચોરી થયેલ એક સુઝુકી એક્સેસ મોટરસાયકલ સાથે એક આરોપીને ગણતરીના દિવસોમાં ઝડપી પાડવામાં આવ્યો છે.આરોપી સામે અગાઉ પણ સોલા હાઈકોર્ટ પોલીસ સ્ટેશનમાં ચોરી સહિતના ગુનાઓ નોંધાયેલા છે.
રિપોર્ટ મુજબ, એલસીબી ઝોન-1ના પો.ઇન્સ્પેક્ટર જી.કે. ચાવડાની સૂચના મુજબ પોલીસ સ્ટાફ પેટ્રોલિંગમાં હતો ત્યારે ખાનગી બાતમીના આધારે કાર્યવાહી હાથ ધરવામાં આવી હતી.પોલીસે અનમોલ રાજેશભાઈ યાદવ (ઉં.વ. 22), રહે. ચાણક્યપુરી સેક્ટર-5, સોલા, અમદાવાદ અને મૂળ વતન ઇટાવા, ઉત્તર પ્રદેશને ઝડપી પાડ્યો હતો. આરોપી પાસેથી સુઝુકી કંપનીનું કાળા રંગનું એક્સેસ સ્કૂટર કબજે કરવામાં આવ્યું છે, જેની અંદાજિત કિંમત રૂ. 35,000 હોવાનું પોલીસે જણાવ્યું છે. વાહન પર નંબર પ્લેટ ન હોવાનું પણ સામે આવ્યું છે.
પોલીસ તપાસમાં સામે આવ્યું છે કે પકડાયેલ આરોપી અનમોલ યાદવ અગાઉ પણ ગંભીર ગુનાઓમાં સંડોવાયેલો રીઢો ગુનેગાર છે. તેની સામે અગાઉ સોલા હાઈકોર્ટ પોલીસ સ્ટેશનમાં ચોરી અને હત્યા અને અપહરણના ગુનાઓ નોંધાયેલા છે.
આ પ્રશંસનીય અને સફળ કામગીરીમાં LCB ઝોન-૧ ના PSI જી. કે. ચાવડા, ASI મયુરધ્વજસિંહ રાજેન્દ્રસિંહ, હેડ કોન્સ્ટેબલ અરવિંદભાઈ ડાહ્યાભાઈ, કિરણકુમાર અંબાલાલ, તેમજ પોલીસ કોન્સ્ટેબલ ગંગારામભાઈ રૂપસીભાઈ, દેવેન્દ્રકુમાર લક્ષ્મણભાઈ અને કમલેશ અમરશીભાઈ જોડાયા હતા.