અમદાવાદ : અમદાવાદ ફાયર એન્ડ ઇમરજન્સી સર્વિસિસ (AFES) દ્વારા શહેરમાં ફાયર સેફ્ટીના નિયમોનું કડક પાલન સુનિશ્ચિત કરવા માટે હોટલો, શૈક્ષણિક સંસ્થાઓ અને કોચિંગ ક્લાસિસ સામે વ્યાપક ચકાસણી ઝુંબેશ હાથ ધરવામાં આવી છે. શહેરના વિવિધ ઝોનમાં હાથ ધરાયેલી આ કાર્યવાહી દરમિયાન ફાયર સેફ્ટીના નિયમોનું ઉલ્લંઘન કરનાર એકમો સામે નોટિસો ફટકારવામાં આવી છે તેમજ ગંભીર બેદરકારી સામે સીલિંગની કાર્યવાહી પણ કરવામાં આવી છે.
રિપોર્ટ મુજબ, ફાયર વિભાગની તપાસ દરમિયાન શહેરની 154 હોટલોને ફાયર સેફ્ટીના નિયમોના ભંગ બદલ નોટિસ ફટકારવામાં આવી છે. આ ઉપરાંત 62 શાળાઓ, શૈક્ષણિક સંસ્થાઓ અને કોચિંગ ક્લાસોને પણ નિયમોમાં ખામી જણાતા નોટિસ આપવામાં આવી છે. વિભાગના જણાવ્યા અનુસાર અનેક સ્થળોએ જરૂરી ફાયર સેફ્ટી સાધનો અધૂરા હતા અથવા નિયમ મુજબ જાળવણી કરવામાં આવી નહોતી.
ઝોન પ્રમાણે કાર્યવાહી
ફાયર વિભાગે શહેરના તમામ ઝોનમાં અલગ અલગ પ્રમાણમાં કાર્યવાહી હાથ ધરી છે.
સાઉથ વેસ્ટ ઝોન
20 હોટલોને નોટિસ
સાઉથ ઝોન
13 હોટલોને નોટિસ
3 શૈક્ષણિક અને કોચિંગ સંસ્થાઓને નોટિસ
સેન્ટ્રલ ઝોન
27 હોટલોને નોટિસ
8 શૈક્ષણિક સંસ્થાઓ સામે કાર્યવાહી
નોર્થ વેસ્ટ ઝોન
24 હોટલોને નોટિસ
5 શૈક્ષણિક સંસ્થાઓને નોટિસ
6 હોટલો સીલ
ઈસ્ટ ઝોન
16 હોટલોને નોટિસ
24 શૈક્ષણિક અને કોચિંગ સંસ્થાઓને નોટિસ
વેસ્ટ ઝોન
47 હોટલોને નોટિસ
12 શૈક્ષણિક સંસ્થાઓને નોટિસ
7 હોટલો અને 1 શૈક્ષણિક સંસ્થા સીલ
નોર્થ ઝોન
7 હોટલોને નોટિસ
10 શૈક્ષણિક સંસ્થાઓને નોટિસ
અમદાવાદ ફાયર એન્ડ ઇમરજન્સી સર્વિસિસ વિભાગના જણાવ્યા અનુસાર શહેરમાં ફાયર સેફ્ટીના નિયમોનું કડક પાલન થાય તેમજ નાગરિકોના જાનમાલની સુરક્ષા સુનિશ્ચિત રહે તે માટે આવી ચકાસણી અને અમલીકરણની કાર્યવાહી આગામી સમયમાં પણ સતત ચાલુ રાખવામાં આવશે. ફાયર સેફ્ટી સંબંધિત નિયમોનું પાલન ન કરનાર સંસ્થાઓ અને એકમો સામે નિયમ મુજબ કડક કાર્યવાહી કરવામાં આવશે.