અમદાવાદ : દિવાળીના પર્વને ધ્યાનમાં રાખીને અમદાવાદ શહેર પોલીસ કમિશનરે નાગરિકો માટે ખાસ સંદેશ આપ્યો છે. તહેવારો દરમિયાન બજારોમાં ખરીદી કરવા જતી વખતે બાળકોનું ધ્યાન રાખવા, અજાણ્યા લોકોની વાતમાં ન આવવા અને કોઈપણ શંકાસ્પદ પ્રવૃત્તિ જણાય તો તાત્કાલિક પોલીસને જાણ કરવા અપીલ કરવામાં આવી છે. શહેરમાં સુરક્ષા વ્યવસ્થા મજબૂત બનાવવા પોલીસની અલગ-અલગ ટીમો પેટ્રોલિંગ પણ કરશે.
રિપોર્ટ મુજબ, દિવાળીના તહેવાર દરમિયાન બજારો અને શોપિંગ વિસ્તારોમાં લોકોની ભારે ભીડ જોવા મળે છે. આવી સ્થિતિમાં ખરીદી કરવા જતા નાગરિકોએ બાળકોને પોતાની નજર સમક્ષ રાખવા પોલીસ કમિશનરે અપીલ કરી છે. ભીડભાડવાળા સ્થળોએ બાળકોને એકલા ન છોડવા અને તેમની સુરક્ષાનું ખાસ ધ્યાન રાખવા સૂચના આપવામાં આવી છે.
https://t.co/QUpxBKcIjp
— Ahmedabad Police અમદાવાદ પોલીસ (@AhmedabadPolice) November 3, 2026
દિવાળી વેકેશન દરમિયાન ઘણા લોકો પરિવાર સાથે બહારગામ ફરવા જતા હોય છે. આ દરમિયાન સોશિયલ મીડિયા પર લાઈવ લોકેશન અથવા પ્રવાસ અંગેની તાત્કાલિક વિગતો જાહેર ન કરવાની અપીલ કરવામાં આવી છે. આવી માહિતીનો દુરુપયોગ થવાની શક્યતા હોવાથી સાવચેતી રાખવી જરૂરી છે.શહેરમાં કોઈપણ અજાણી અથવા શંકાસ્પદ વ્યક્તિ કે પ્રવૃત્તિ નજરે પડે તો નાગરિકોએ તાત્કાલિક 112 નંબર પર ફોન કરીને પોલીસને જાણ કરવી.
અમદાવાદ પોલીસ કમિશનરે ખાસ ચેતવણી આપતાં જણાવ્યું છે કે કોઈ વ્યક્તિ પોલીસ અથવા ઇન્કમટેક્સ વિભાગના અધિકારી તરીકે ઓળખ આપીને બેગ ખોલવા કે તપાસ કરવાના નામે દબાણ કરે તો સાવચેત રહેવું. આવી કોઈ શંકાસ્પદ પરિસ્થિતિ સર્જાય તો તરત જ 112 નંબર પર સંપર્ક કરવો.પોલીસ કમિશનરે નાગરિકોને સાવચેતી રાખવા અને શંકાસ્પદ બાબતોને અવગણવાને બદલે પોલીસ સુધી પહોંચાડવા જણાવ્યું છે.
દિવાળીના તહેવાર દરમિયાન શહેરમાં કાયદો અને વ્યવસ્થા જળવાઈ રહે તે માટે અમદાવાદ શહેર પોલીસ દ્વારા સુરક્ષા વ્યવસ્થા ગોઠવવામાં આવશે. પોલીસની અલગ-અલગ ટીમો શહેરના બજારો, ભીડવાળા વિસ્તારો અને મહત્વનાં સ્થળોએ પેટ્રોલિંગ કરશે. પોલીસ કમિશનરે નાગરિકોને સાવચેતી રાખીને શાંતિપૂર્ણ અને સુરક્ષિત રીતે દિવાળીની ઉજવણી કરવા અપીલ કરી છે.