અમદાવાદની આ હોસ્પિટલની બેઝમેન્ટ ડ્રેનેજમાં ત્રણ શ્રમિકો ગૂંગળાયા, ફાયરબ્રિગેડે રેસ્ક્યૂ કર્યા

અમદાવાદ : અમદાવાદના યુ.એન.મહેતા હોસ્પિટલ કેમ્પસમાં આવેલા અંડરગ્રાઉન્ડ સુવેજ ટેન્કમાં સોમવાર સાંજે ગંભીર દુર્ઘટના સર્જાઈ હતી. સુવેજ ટેન્કની સફાઈ દરમિયાન એક શ્રમિક બેભાન થઈ અર્ધભરેલી ટેન્કમાં પડી ગયો હતો. તેને બચાવવા માટે ઉતરેલા અન્ય બે શ્રમિકો પણ ઝેરી ગેસના પ્રભાવથી બેભાન થઈ ગયા. જો કે, અમદાવાદ ફાયર બ્રિગેડની ટીમે તાબડતોબ રેસ્ક્યુ ઓપરેશન હાથ ધરીને ત્રણેય શ્રમિકોને મોતના મોંમાંથી બહાર કાઢી લીધા છે.

રિપોર્ટ મુજબ, યુ.એન.મહેતા હોસ્પિટલ કેમ્પસમાં આવેલી અંડરગ્રાઉન્ડ સુવેજ ટેન્ક (ગટરના ખાડા)ની સફાઈ દરમિયાન એક શ્રમિક અચાનક બેભાન થઈ ગયો હતો અને અર્ધ ભરેલી ટેન્કમાં નીચે પટકાયો હતો. તેને બચાવવા માટે અન્ય બે વ્યક્તિઓ પણ ટેન્કમાં નીચે ઉતર્યા હતા, પરંતુ ઝેરી ગેસની અસરના કારણે તેઓ પણ ત્યાં જ બેભાન થઈ ગયા હતા અને સુવેજના પાણીમાં ફસાઈ ગયા હતા.

ઘટનાને પગલે આસપાસના સ્થાનિક લોકો તાત્કાલિક મદદે દોડી આવ્યા હતા અને એક શ્રમિકને બહાર કાઢવામાં સફળ રહ્યા હતા. જ્યારે બાકીના બે શ્રમિકો ફસાયેલા હોવાની જાણ થતાં જ અમદાવાદ ફાયર એન્ડ ઇમરજન્સી સર્વિસીસની ટીમ ઘટનાસ્થળે પહોંચી હતી. ફાયર બ્રિગેડના જવાનોએ તાબડતોબ રેસ્ક્યુ ઓપરેશન હાથ ધરીને બાકીના બંને શ્રમિકોને પણ બહાર કાઢ્યા હતા.

અકસ્માતનો ભોગ બનેલા ત્રણેય શ્રમિકોને તાત્કાલિક હોસ્પિટલમાં સારવાર અર્થે દાખલ કરવામાં આવ્યા છે. હાલ તેમની તબિયત અંગે કોઈ સત્તાવાર માહિતી સામે આવી નથી. સરકારી અધિકારીઓના જણાવ્યા અનુસાર, આ ઘટના મેન્ટેનન્સના કામ દરમિયાન બનેલી એક દુર્ઘટના છે. પ્રાથમિક તપાસમાં આ ઘટનામાં અમદાવાદ મ્યુનિસિપલ કોર્પોરેશન (AMC)ની કોઈ બેદરકારી હોવાનું સામે આવ્યું નથી.

પ્રાથમિક માહિતી મુજબ, ટેન્કની અંદર ઝેરી વાયુઓના કારણે શ્રમિકો બેભાન થયા હોવાની શક્યતા વ્યક્ત કરવામાં આવી રહી છે. ત્રણેયને તાત્કાલિક સારવાર માટે હોસ્પિટલમાં ખસેડવામાં આવ્યા હતા.સમયસર ફાયર બ્રિગેડની કામગીરી અને રેસ્ક્યૂ ટીમની સતર્કતાને કારણે મોટી જાનહાનિ ટળી હોવાનું અધિકારીઓએ જણાવ્યું છે. ઘટનાને લઈને વધુ તપાસ હાથ ધરવામાં આવી રહી છે.