અમદાવાદ : સોશિયલ મીડિયાથી શરૂ થયેલો પ્રેમસંબંધ હવે સગીરા માટે મુશ્કેલીનું કારણ બન્યો હોવાનો ચોંકાવનારો કિસ્સો અમદાવાદના નરોડામાં સામે આવ્યો છે. 16 વર્ષની સગીરાને સ્નેપચેટના માધ્યમથી યુવકે પ્રેમજાળમાં ફસાવી, લગ્નની લાલચે દુષ્કર્મ આચર્યું હતું. જોકે, બાદમાં તેણે ન કરવાનું કામ કરી નાખ્યુ. અંતે આ મામલે નરોડા પોલીસ સ્ટેશનમાં ફરિયાદ નોંધાઈ અને પોલીસે ગુનો નોંધી આરોપીની ધરપકડ કરી છે.
પોલીસ ફરિયાદ મુજબ, ઘટનાની વિગતવાર વાત કરીએ તો 16 વર્ષીય સગીરા તેના માતાના ફોનમાં સ્નેપચેટ એપ્લિકેશનનો ઉપયોગ કરતી હતી, જેમાં જયદીપ રબારીના સંપર્કમાં આવી, જયદીપે સગીરાને પ્રેમજાળમાં ફસાવી અને લગ્નની લાલચ આપી. જ્યારે સગીરા ધોરણ 10 ની માર્કશીટ લેવા ઘરની બહાર નીકળી, ત્યારે જ જયદીપે તેને નાના ચિલોડામાં આવેલા એટલાન્ટા બિઝનેસ હબમાં એક હોટલમાં લઈ ગયો હતો. જ્યાં લગ્નની લાલચ આપીને સગીરા સાથે શારીરિક સંબંધો બાંધ્યા હતા.નરોડા પોલીસની કસ્ટડીમાં દેખાતા આરોપીનું નામ જયદીપ રબારી છે, 16 વર્ષની સગીરા સાથે દુષ્કર્મ ગુજારવાના ગુનામાં તેની ધરપકડ કરવામાં આવી છે.
જયદીપે આ સાથે જ ગુપ્ત રીતે સગીરાનો અંગત પળોનો વીડિયો મોબાઈલમાં રેકોર્ડ કર્યો હતો. થોડા દિવસો પછી આરોપીએ સગીરાને ફરીથી એ હોટલમાં બોલાવી હતી. જ્યાં સગીરાએ લગ્નની વાત કરતા આરોપીએ આનાકાની કરી જેથી સગીરા હોટલમાંથી નીકળવા ગઈ તે સમયે આરોપીએ સગીરાને બળજબરી પૂર્વક પકડી રાખી દુષ્કર્મ ગુજાર્યું હતું. તે પછી જયદીપે સગીરાને લગ્ન નથી કરવાનો અને શારીરિક સંબંધો વિશે કોઈને કહેવા પર તેની અને પરિવારની હત્યાની ધમકી આપી હતી.
સગીરાના પરિવારે નાનપણમાં સમાજના એક યુવક સાથે તેની સગાઈ નક્કી કરી હતી. જોકે આરોપી જયદીપ રબારીએ સગીરાના મંગેતરને અંગત પળોનો વીડિયો મોકલ્યો, જેના કારણે સગીરાની સગાઈ તૂટી ગઈ. અંતે સગીરાના પિતાએ નરોડા પોલીસ સ્ટેશનમાં જયદીપ રબારી વિરુદ્ધ પોક્સો અને આઈટી એક્ટ હેઠળ ગુનો નોંધાવ્યો હતો. પોલીસે ગણતરીના કલાકોમાં જ આરોપીને પકડી પાડ્યો હતો. આરોપી 21 વર્ષનો છે અને ડ્રાઇવિંગનું કામ કરે છે. પરંતુ આ ઘટના ફરી એકવાર માતાપિતા માટે લાલબત્તી સમાન છે કે, પોતાના સગીર સંતાનો સોશિયલ મીડિયા પર કોના સંપર્કમાં છે, તેનું ધ્યાન રાખવું કેટલું જરૂરી છે.