માઉન્ટ આબુમાં નિઃશુલ્ક પર્વતારોહણ તાલીમની તક, રહેવા-જમવા સાથે મુસાફરી ભાડું પણ મળશે; જાણો અરજીની સંપૂર્ણ વિગતો

ગાંધીનગર : સાહસ, રોમાંચ અને પર્વતારોહણમાં રસ ધરાવતા ગુજરાતના બાળકો અને યુવાનો માટે રાજ્ય સરકાર દ્વારા મહત્વની તક આપવામાં આવી છે. યુવક સેવા અને સાંસ્કૃતિક પ્રવૃત્તિઓ વિભાગ હેઠળ સ્વામી વિવેકાનંદ પર્વતારોહણ તાલીમ સંસ્થા, માઉન્ટ આબુ દ્વારા વિવિધ પર્વતારોહણ તાલીમ કોર્સનું આયોજન કરવામાં આવ્યું છે. નિઃશુલ્ક પર્વતારોહણ તાલીમ કોર્સમાં રહેવા, જમવા અને મુસાફરીની મફત સુવિધા સાથે એડવેન્ચર ટ્રેનિંગ મેળવવાની સંપૂર્ણ વિગતો અને છેલ્લી તારીખ જાણો

રિપોર્ટ મુજબ, ગુજરાત સરકારના યુવક સેવા અને સાંસ્કૃતિક પ્રવૃત્તિઓ વિભાગ દ્વારા માઉન્ટ આબુ સ્થિત સ્વામી વિવેકાનંદ પર્વતારોહણ તાલીમ સંસ્થા ખાતે રાજ્યના યુવાનો માટે વિવિધ નિઃશુલ્ક પર્વતારોહણ કોર્સનું આયોજન કરવામાં આવ્યું છે. સાહસ અને રોમાંચ ક્ષેત્રે કારકિર્દી ઘડવા માંગતા કે કૌશલ્ય વિકસાવવા માંગતા ઉમેદવારો માટે આ એક ઉત્તમ તક છે.

કયા કોર્સ માટે ક્યારે અરજી કરવી?
એડવેન્ચર કોર્સ:
– ઉંમર: 8 થી 13 વર્ષ
– તાલીમ: 17 થી 23 નવેમ્બર, 2026
– અરજીની છેલ્લી તારીખ: 12 ઓક્ટોબર, 2026

એડવાન્સ રોક ક્લાઇમ્બીંગ કોર્સ:
– ઉંમર: 15 થી 45 વર્ષ
– લાયકાત: બેઝિક ખડક ચઢાણ કોર્સમાં ‘A’ અથવા ‘B’ ગ્રેડ
– તાલીમ: 27 નવેમ્બરથી 11 ડિસેમ્બર, 2026
– અરજીની છેલ્લી તારીખ: 12 ઓક્ટોબર, 2026

કોચિંગ રોક ક્લાઇમ્બીંગ કોર્સ:
– લાયકાત: ધોરણ 10 પાસ અને એડવાન્સ કોર્સ ઉત્તીર્ણ
– તાલીમ: 12 ડિસેમ્બર, 2026 થી 10 જાન્યુઆરી, 2027
– અરજીની છેલ્લી તારીખ: 30 ઓક્ટોબર, 2026

આર્ટિફિશિયલ કોર્સ:
– લાયકાત: ધોરણ 10 પાસ
– ઉંમર: 18 થી 45 વર્ષ
– તાલીમ: 4 થી 13 ફેબ્રુઆરી, 2027
– અરજીની છેલ્લી તારીખ: 30 ડિસેમ્બર, 2026

ભોજન, રહેઠાણ અને મુસાફરી ભાડાની નિઃશુલ્ક સુવિધા
આ તાલીમ શિબિરમાં પસંદગી પામનાર તમામ તાલીમાર્થીઓ માટે રહેવા, જમવા તથા તાલીમની સંપૂર્ણ વ્યવસ્થા સરકાર દ્વારા વિનામૂલ્યે કરવામાં આવશે. તદુપરાંત, નિયત સ્થળ સુધી આવવા-જવાનું સામાન્ય એસ.ટી. બસ અથવા રેલવે સેકન્ડ ક્લાસનું મુસાફરી ભાડું પણ નિયમાનુસાર મળવાપાત્ર રહેશે.

અરજી કેવી રીતે કરવી?
ગુજરાતના વતની અને રસ ધરાવતા ઉમેદવારોએ સંસ્થાના Facebook પેજ facebook.com/svimadmin પરથી નિયત અરજી ફોર્મ મેળવી લેવાનું રહેશે.

ભરેલા અરજી ફોર્મ સાથે નીચેના દસ્તાવેજોની ખરી નકલ જોડવાની રહેશે:

– આધારકાર્ડ/રહેઠાણનો પુરાવો
– શારીરિક યોગ્યતાનું તબીબી પ્રમાણપત્ર
– જન્મ તારીખનો દાખલો
– વાલીનું સંમતિપત્રક
– અગાઉના તાલીમ પ્રમાણપત્રો (લાગુ પડતા હોય તો)

અરજી ‘આચાર્યશ્રી, સ્વામી વિવેકાનંદ પર્વતારોહણ તાલીમ સંસ્થા, ગૌમુખ રોડ, માઉન્ટ આબુ, પીન: 307501’ ખાતે નિયત સમયમર્યાદામાં મોકલવાની રહેશે.

પસંદગી પામેલા ઉમેદવારોને ઈ-મેઈલ અથવા ટેલિફોન દ્વારા જાણ કરવામાં આવશે.
વધુ માહિતી માટે: 📞 6377890298 (કચેરી સમય દરમિયાન, જાહેર રજા સિવાય)