અમદાવાદ : દિવાળીના તહેવારો નજીક આવતા જ શહેરમાં ગેરકાયદેસર અને ફાયર સેફ્ટીના નિયમોને નેવે મૂકીને ધમધમતા ફટાકડાના વેચાણ સામે AMCએ આકરી કાર્યવાહી હાથ ધરી છે. અમદાવાદના ગીચ કોટ વિસ્તાર ગણાતા શાહપુરમાં કોઈપણ જાતની સત્તાવાર પરવાનગી કે એનઓસી (NOC) વિના ફટાકડાનું વેચાણ કરી રહેલા 7 વેપારીઓ સામે એસ્ટેટ અને ફાયર વિભાગની ટીમોએ ત્રાટકીને તમામ ૭ દુકાનોને સ્થળ પર જ સીલ કરી દીધી છે. AMCની આ ઝંઝાવાતી કાર્યવાહીના પગલે ગેરકાયદે ફટાકડાનો વેપાર કરતા તત્વોમાં ભારે ફફડાટ વ્યાપી ગયો છે.
રિપોર્ટ મુજબ, જાહેર સલામતીને ધ્યાનમાં AMCના એસ્ટેટ વિભાગ દ્વારા સઘન ચેકિંગ હાથ ધરવામાં આવ્યું હતું.શાહપુરના મુખ્ય બજાર અને રહેણાંક સોસાયટીઓ નજીક આવેલી દુકાનોમાં કોઈપણ જાતના લાયસન્સ વગર ફટાકડાનો મોટો જથ્થો રાખીને વેચાણ કરવામાં આવી રહ્યું હોવાની વિગતો પ્રકાશમાં આવી હતી.અધિકારીઓની ટીમે સ્થળ પર પહોંચી વેપારીઓ પાસેથી સંબંધિત મંજૂરી અને ફાયર સેફ્ટીના સાધનો અંગે ચકાસણી હાથ ધરી હતી.તેની બાદ તંત્રએ તાત્કાલિક ધોરણે 7 દુકાનોને સીલ મારી દીધી હતી.
આ અગાઉ પણ કોટ વિસ્તારના કાલુપુરમાં તંત્ર દ્વારા ઓચિંતા દરોડા પાડીને પરવાનગી વિના ધમધમતી ફટાકડાની દુકાનોને સીલ કરવામાં આવી હતી.કાલુપુર બાદ હવે શાહપુરમાં પણ આવી જ કડક કાર્યવાહી હાથ ધરાતાં કોટ વિસ્તારના ફટાકડા બજારના વેપારીઓમાં સોપો પડી ગયો છે.સાંકડી શેરીઓ અને ગીચ બજારોમાં કોઈપણ દુર્ઘટના સર્જાય તો જાનમાલનું મોટું નુકસાન થઈ શકે તેમ હોવાથી તંત્ર દ્વારા કોઈ પણ જાતની બાંધછોડ કરવામાં આવી રહી નથી.
AMC એ તમામ નાના-મોટા વેપારીઓને સ્પષ્ટ નિર્દેશ આપ્યા છે.રહેણાંક વિસ્તારોમાં કે યોગ્ય સુરક્ષા સાધનો વિના ફટાકડાનો વેપાર કરવો કાયદાકીય ગુનો બને છે.આગામી દિવસોમાં પણ શહેરના પૂર્વ અને પશ્ચિમ ઝોનમાં જ્યાં પણ મંજૂરી વગર ફટાકડાનું વેચાણ ચાલતું જણાશે ત્યાં કોઈપણ પૂર્વ નોટિસ વિના સીલિંગ સહિતની કાયદેસર કાર્યવાહી કરવામાં આવશે.