ગાંધીનગર : ગાંધીનગર મહાનગરપાલિકાના 11 વોર્ડની 44 બેઠક પરનું ચૂંટણી પરિણામનું સ્પષ્ટ થઈ ગયું છે. ભાજપની 38, કોંગ્રેસની 5 અને અપક્ષની 1 બેઠક પર જીત થઈ છે. આ વખતની ચૂંટણીમાં સરેરાશ 59.25% મતદાન નોંધાયું, જેમાં કુલ 2,59,985 નોંધાયેલા મતદારોમાંથી 1,54,045 મતદારોએ મતાધિકારનો ઉપયોગ કર્યો હતો.મતદારોએ આપેલા જનાદેશ બાદ હવે વિવિધ વોર્ડમાં પક્ષોની સ્થિતિ સ્પષ્ટ થઈ ગઈ છે.
રિપોર્ટ મુજબ, ગાંધીનગર મહાનગરપાલિકાના ચૂંટણીનાં પરિણામોમાં ભાજપે મજબૂત પ્રદર્શન કર્યું છે. વોર્ડ નંબર 1, 3, 4, 5, 8, 9, 10 અને 11માં ભાજપના ઉમેદવારોએ ચારેય બેઠકો પર જીત મેળવીને ક્લીન સ્વીપ કર્યો છે. આ આઠ વોર્ડમાં ભાજપે તમામ 32 બેઠકો પોતાના નામે કરી છે.વોર્ડ નંબર 2માં ભાજપે ત્રણ બેઠકો જીતી હતી, જ્યારે એક બેઠક અપક્ષ ઉમેદવારના ફાળે ગઈ હતી. બીજી તરફ, વોર્ડ નંબર 7માં ભાજપે ત્રણ બેઠકો મેળવી હતી અને કોંગ્રેસને એક બેઠક પર જીત મળી હતી.
આ ચૂંટણીમાં સૌથી વધુ ચર્ચાસ્પદ પરિણામ વોર્ડ નંબર 6નું રહ્યું છે. અહીં કોંગ્રેસે ચારેય બેઠકો પર જીત મેળવીને ભાજપને મોટો ઝટકો આપ્યો છે. આ વોર્ડમાં ભાજપ એક પણ બેઠક જીતી શક્યો નથી. કોંગ્રેસની આ જીતે મહાનગરપાલિકાની ચૂંટણીનાં પરિણામોમાં ખાસ ધ્યાન ખેંચ્યું છે.
ગાંધીનગર મહાનગરપાલિકાની આ ચૂંટણીમાં ભાજપે મોટાભાગની બેઠકો પર પોતાની પકડ જાળવી રાખી છે. જોકે, વોર્ડ નંબર 6માં કોંગ્રેસની ચારેય બેઠકો પરની જીત અને વોર્ડ નંબર 2માં અપક્ષ ઉમેદવારની સફળતાએ ચૂંટણીનાં પરિણામોને રસપ્રદ બનાવ્યાં છે.
સેક્ટર-15 સ્થિત કોલેજ બિલ્ડિંગના પાંચ રૂમમાં આજે સવારે 9 વાગ્યાથી મતગણતરી શરૂ કરવામાં આવી હતી. મતગણતરી પૂર્ણ થતાં જ વિવિધ વોર્ડના પરિણામો સામે આવ્યાં હતાં.