અમદાવાદ : અમદાવાદ મ્યુનિસિપલ કોર્પોરેશનના પશ્ચિમ ઝોન સોલિડ વેસ્ટ મેનેજમેન્ટ વિભાગ દ્વારા જાહેર માર્ગો પર ગંદકી તથા ન્યૂસન્સ કરતા એકમો અને પ્રતિબંધિત પ્લાસ્ટિકનો ઉપયોગ, વેચાણ, સંગ્રહ કે ઉત્પાદન કરતા વેપારીઓ સામે છેલ્લા ત્રણ દિવસ દરમિયાન સઘન કાર્યવાહી હાથ ધરવામાં આવી હતી.
રિપોર્ટ મુજબ, AMCની સોલિડ વેસ્ટ મેનેજમેન્ટ વિભાગની ટીમોએ પશ્ચિમ ઝોનના વિવિધ વિસ્તારોમાં દિવસ-રાત ચેકિંગ હાથ ધરી કુલ 265 એકમોની તપાસ કરી હતી. તેમાંથી 184 એકમોને ગંદકી અને પ્રતિબંધિત પ્લાસ્ટિક અંગે નોટિસ આપવામાં આવી હતી. કાર્યવાહી દરમિયાન કુલ રૂ. 2.75 લાખનો વહીવટી ચાર્જ વસૂલવામાં આવ્યો હતો. ઉપરાંત 4.3 કિલોગ્રામ પ્રતિબંધિત પ્લાસ્ટિક જપ્ત કરીને તેના પેટે રૂ. 65,500નો વહીવટી ચાર્જ વસૂલાયો હતો.
જાહેર માર્ગો પર ગંદકી અને ન્યૂસન્સ કરતા કુલ 8 એકમોને સીલ કરવામાં આવ્યા હતા અને દંડનીય કાર્યવાહી હાથ ધરવામાં આવી હતી. આ એકમો પાસેથી રૂ. 2.10 લાખનો વહીવટી ચાર્જ વસૂલવામાં આવ્યો હતો. સીલ કરાયેલા એકમોમાં ચાંદખેડા, એસ.પી. સ્ટેડિયમ, નવા વાડજ અને નારણપુરા વિસ્તારના વિવિધ વેપારી એકમોનો સમાવેશ થાય છે.
AMC દ્વારા માત્ર દંડાત્મક કાર્યવાહી જ નહીં, પરંતુ જાહેર જાગૃતિ માટે પણ કામગીરી કરવામાં આવી રહી છે. પશ્ચિમ ઝોનના રહેણાંક વિસ્તારો અને વાણિજ્યિક એકમોમાં કચરો જાહેરમાં ન ફેંકવા, કચરાનું સેગ્રીગેશન કરવા અને AMCના વાહનમાં જ કચરો આપવા અંગે IEC પ્રવૃત્તિઓ તથા પત્રિકાઓ દ્વારા લોકોને સમજ આપવામાં આવી રહી છે.
AMCએ સ્પષ્ટ કર્યું છે કે શહેરના નાગરિકોના સ્વાસ્થ્ય અને આરોગ્ય સાથે ચેડા કરતા એકમો સામે આગામી દિવસોમાં પણ સખત કાર્યવાહી ચાલુ રાખવામાં આવશે.