અમદાવાદ : અમદાવાદના વાહનચાલકો માટે રાહતના સમાચાર સામે આવ્યા છે. લગભગ ત્રણ વર્ષ બાદ રૂ.107.86 કરોડના ખર્ચે તૈયાર થયેલો 735 મીટર લાંબા વાડજ ફ્લાયઓવર આવતીકાલે 24 મી સપ્ટેમ્બરથી વાહનવ્યવહાર માટે ખુલ્લો મુકાવાની તૈયારીમાં છે. હાલમાં બ્રિજ પર કલરકામ, લાઈટિંગ અને આખરી ઓપ આપવાનું કામ પૂરજોશમાં ચાલી રહ્યું છે. તમામ તૈયારીઓ આટોપીને આ મહત્વકાંક્ષી બ્રિજ આવતીકાલે સવારે 10-00 કલાકે CM ભુપેન્દ્ર પટેલના વરદહસ્તે વાહનવ્યવહાર માટે ખુલ્લો મૂકી દેવાય તેવી પ્રબળ શક્યતાઓ વર્તાઈ રહી છે.
આ નવો 4-લેન વાડજ ફ્લાયઓવર બ્રિજ શરૂ થવાથી દરરોજ આ માર્ગ પરથી પસાર થતાં 2 લાખથી વધુ વાહનચાલકોને સીધો અને મોટો ફાયદો થશે. અત્યાર સુધી પીક અવર્સ દરમિયાન વાડજ જંકશન અને આસપાસના રસ્તાઓ પર વાહનોની લાંબી કતારો લાગતી હતી, જેના કારણે વાહનચાલકોનો ઘણો સમય વેડફાતો હતો. હવે આ બ્રિજ ચાલુ થઈ જવાથી વાહનચાલકોને ટ્રાફિક જામની ઝંઝટમાંથી કાયમી છુટકારો મળશે, જેનાથી મુસાફરોનો કિંમતી સમય અને ઈંધણ બંનેની મોટી બચત થશે.
ખાસ કરીને વાડજથી ગાંધીઆશ્રમ તરફ જતાં અને આવતાં માર્ગ પર ટ્રાફિકનું ભારણ નોંધપાત્ર રીતે ઘટી જશે. ગાંધીઆશ્રમ પુનર્વિકાસ પ્રોજેક્ટ અને આસપાસના વિસ્તારોની અવરજવરને ધ્યાનમાં રાખીને આ બ્રિજ વાહનચાલકો માટે અત્યંત ચાવીરૂપ સાબિત થશે. બ્રિજ ખુલ્લો મુકાતાં જ આ વિસ્તારમાં વાહન વ્યવહાર વધુ સુગમ, ઝડપી અને સુરક્ષિત બનશે, જેને પગલે સ્થાનિક રહીશો અને દૈનિક અપ-ડાઉન કરતા શહેરીજનોમાં ઉત્સાહનો માહોલ જોવા મળી રહ્યો છે.