અમદાવાદ : અમદાવાદમાં યોજાનારી વાઈબ્રન્ટ નવરાત્રિમાં પ્રવેશ માટેની પાસ સિસ્ટમને લઈને રાજકીય આક્ષેપ-પ્રતિઆક્ષેપ શરૂ થયા છે. વિપક્ષ દ્વારા પાસ વ્યવસ્થાને લઈને સવાલો ઉઠાવવામાં આવ્યા છે. આ મામલે રાજ્યના નાયબ મુખ્યમંત્રી હર્ષભાઈ સંઘવીએ નિવેદન આપી સમગ્ર વ્યવસ્થા અંગે સ્પષ્ટતા કરી છે.
રિપોર્ટ મુજબ, રાજ્યના નાયબ મુખ્યમંત્રી હર્ષ સંઘવીનું મહત્વપૂર્ણ નિવેદન સામે આવ્યું છે. ભૂતકાળમાં નાગરિકો માટે બિલકુલ વિનામૂલ્યે (ફ્રી) રહેલી પ્રવેશ પ્રક્રિયા સામે આ વર્ષે બુકિંગ ચાર્જ વસૂલવામાં આવી રહ્યો હોવાના વિપક્ષના આક્ષેપો સામે તેમણે ખુલાસો કર્યો હતો કે, ઓનલાઇન મૂકવામાં આવેલા આ પાસ કોઈ કમાણી માટે નહીં પરંતુ માત્ર વ્યવસ્થા જાળવવા માટે મૂકાયેલા ‘ટોકન’ છે.
નાયબ મુખ્યમંત્રીએ જણાવ્યું કે નાગરિકોને કોઈ સરકારી ઓફિસમાં જઈને લાંબી પ્રક્રિયામાંથી પસાર થવાની જરૂર ન પડે તે માટે ઓનલાઈન ટોકનની વ્યવસ્થા કરવામાં આવી છે. આથી લોકો પોતાના સ્થળેથી જ જરૂરી પ્રક્રિયા પૂર્ણ કરી શકે અને કાર્યક્રમમાં હાજરી માટેની વ્યવસ્થા સરળતાથી મેળવી શકે તેવો પ્રયાસ કરવામાં આવ્યો છે.
નાયબ મુખ્યમંત્રીએ સરકારી ગરબામાં સામાન્ય વર્ગ અને જરૂરિયાતમંદ લોકોની ચિંતા વ્યક્ત કરતા કહ્યું કે, સરકાર તમામ વર્ગોનું ધ્યાન રાખી રહી છે. દિવ્યાંગ નાગરિકો તથા દૂર-દૂરના ગામડાઓમાંથી આ વાઇબ્રન્ટ મહોત્સવ જોવા ઈચ્છતા લોકોને લાવવા અને લઈ જવા માટે સ્થાનિક અમદાવાદ મ્યુનિસિપલ કોર્પોરેશન દ્વારા વિશેષ પરિવહન અને પ્રવેશનું સુંદર આયોજન કરવામાં આવશે.
વાઈબ્રન્ટ નવરાત્રિમાં માત્ર પ્રવેશ વ્યવસ્થા જ નહીં, પરંતુ વિવિધ વર્ગના લોકોને કાર્યક્રમ સાથે જોડવા માટે પણ ખાસ આયોજન કરવામાં આવ્યું હોવાનું હર્ષભાઈ સંઘવીએ જણાવ્યું. ખાસ કરીને દિવ્યાંગ બાળકોને મફતમાં કાર્યક્રમ સ્થળ સુધી લાવવા અને પરત લઈ જવા માટે વિશેષ વ્યવસ્થા કરવામાં આવી છે.