અમદાવાદ : ગુજરાતમાં સોશિયલ મીડિયા દ્વારા જાણીતા બનેલા ‘ગુજ્જુ લવ ગુરુ’ ઉર્ફે ચંદન રાઠોડના નિધન બાદ તેમના પરિવારને આર્થિક મદદ પહોંચાડવા માટે શરૂ કરવામાં આવેલી ઝુંબેશને બહોળો પ્રતિસાદ મળ્યો છે. ગુજ્જુ લવ ગુરુ ઉર્ફે ચંદન રાઠોડના પરિવારને લોકો તરફથી આર્થિક મદદનો ધોધ વરસ્યો છે. અત્યાર સુધીમાં પરિવારને કુલ રૂ.3.50 કરોડ જેટલી આર્થિક મદદ મળી હોવાનું સામે આવ્યું છે.
રિપોર્ટ મુજબ, ગુજ્જુ લવ ગુરુના પરિવારને વિવિધ માધ્યમો થકી કુલ રૂ.3.50 કરોડની સહાય મળી ચૂકી છે. આ ભંડોળમાં ડિજિટલ પ્લેટફોર્મ્સ અને બેંક ટ્રાન્સફર મારફતે ઓનલાઇન (Online) રૂ.2.96 કરોડનું દાન જમા થયું છે. આ ઉપરાંત, રૂબરૂ મુલાકાત લઈને સહાનુભૂતિ વ્યક્ત કરનારા સ્નેહીઓ અને દાતાઓ દ્વારા રૂ.53.71 લાખની રકમ રોકડ (Cash) સ્વરૂપે પરિવારને સોંપવામાં આવી છે. આટલી મોટી રકમ એકઠી થતાં પરિવારના તમામ સભ્યોનું આર્થિક ભવિષ્ય કાયમ માટે સુરક્ષિત બની ગયું છે.
તાજેતરમાં કોમેડી રીલ્સ અને વીડિયોના કારણે સોશિયલ મીડિયા પર લોકપ્રિય બનેલા ચંદન રાઠોડનું ભાભર નજીક માર્ગ અકસ્માતમાં નિધન થયું હતું. તેમના અચાનક નિધનથી પરિવાર પર આભ તૂટી પડ્યું હતું. ઘરના મોભીની અચાનક વિદાયથી પરિવાર ભાંગી પડ્યો હતો. ત્યારે કેટલાક સેવાભાવી લોકો અને ડિજિટલ ક્રિએટર્સ પરિવારની મદદ માટે આગળ આવ્યા અને આર્થિક રીતે મદદરૂપ થવા માટે ક્રાઉડફંડિંગની પહેલ કરવામાં આવી.
શરૂઆતમાં પરિવારની મદદ માટે 2 કરોડ રૂપિયા એકત્ર કરવાનો લક્ષ્યાંક નક્કી કરવામાં આવ્યો હતો. જોકે, આ અભિયાનને મળેલા જબરદસ્ત પ્રતિસાદને કારણે એકત્ર થયેલી રકમ લક્ષ્યાંક કરતાં પણ ઘણી આગળ વધી ગઈ. ગુજરાત ઉપરાંત દેશના અન્ય રાજ્યો તેમજ વિદેશમાં વસતા ગુજરાતીઓએ પણ પોતાની ક્ષમતા પ્રમાણે આર્થિક સહયોગ આપ્યો હતો. મોટી સંખ્યામાં લોકોએ અભિયાનમાં જોડાઈને પરિવાર પ્રત્યે સહાનુભૂતિ અને મદદની ભાવના વ્યક્ત કરી હતી.
હવે એકત્ર થયેલી આ મોટી રકમનો ઉપયોગ કઈ રીતે કરવામાં આવશે તે અંગે મહત્વનો નિર્ણય લેવામાં આવશે. મળતી માહિતી મુજબ પરિવારના સભ્યો અને સેવાભાવી આગેવાનો સાથે ચર્ચા કરીને આગળની યોજના નક્કી કરવાની તૈયારી છે. પરિવારની લાંબા ગાળાની આર્થિક સુરક્ષા, બાળકોનું શિક્ષણ અને તેમના ભવિષ્યને પ્રાથમિકતા આપવામાં આવે તેવી શક્યતા છે. દાનની રકમનો યોગ્ય અને પારદર્શક રીતે ઉપયોગ થાય તે માટે પણ આયોજન કરવામાં આવશે.
આ ઉપરાંત પરિવાર માટે જરૂરી વ્યવસ્થા કર્યા બાદ જો કોઈ રકમ બાકી રહે તો તેનો ઉપયોગ સમાજના અન્ય જરૂરિયાતમંદ લોકો માટે થઈ શકે કે નહીં, તે દિશામાં પણ વિચારણા ચાલી રહી હોવાનું સામે આવ્યું છે.