અમદાવાદ : અમદાવાદમાં નકલી અને હલકી ગુણવત્તાવાળું ઘી વેચતા વેપારીઓ સામે અમદાવાદ મ્યુનિસિપલ કોર્પોરેશન (AMC)ના હેલ્થ વિભાગે કાર્યવાહી શરૂ કરી છે. AMC દ્વારા લેવામાં આવેલા સેમ્પલમાં માધુપુરા માર્કેટમાં આવેલી એક જ દુકાનના 5 સેમ્પલ ફેઈલ થતાં તંત્રએ અલગ-અલગ બ્રાન્ડના આશરે 500 લિટર ઘીનો જથ્થો સીઝ કરી વેપારી સામે કાર્યવાહી કરી છે.
ફૂડ વિભાગના સત્તાવાર સૂત્રોના જણાવ્યા અનુસાર, અમદાવાદના માધુપુરામાં આવેલા HP ફૂડ્સ નામના એકમમાંથી અગાઉ લેવાયેલા ઘીના સેમ્પલ પરીક્ષણમાં ફેલ જાહેર થયા છે. આ ઉપરાંત માર્કેટમાં વેચાતા ગોપી શ્રી દેશી ગાય ઘી, શ્રી અમૂર્ત ઘી, પ્રિયમ ગાય ઘી અને ખુશાલી ગાય ઘી ના સેમ્પલો પણ ગુણવત્તાના માપદંડો પર નિષ્ફળ નીવડ્યા છે. ભેળસેળયુક્ત અને અશુદ્ધ ઘી વેચવા બદલ AMC ફૂડ વિભાગ દ્વારા સંબંધિત એકમોને સીલ કરવાની કામગીરી શરૂ કરવામાં આવી છે.તપાસ દરમિયાન શુદ્ધ ઘીના નામે વનસ્પતિ ઘીનું વેચાણ થતું હોવાનો દાવો કરવામાં આવ્યો છે. આવા ઘી શુદ્ધ ધીના અડધા જેટલા ભાવે વેચાતા હોવાનું વેપારીએ જણાવ્યું હતું.
ઘીમાં ભેળસેળ કરી લોકોના સ્વાસ્થ્ય સાથે ખીલવાડ કરતા વેપારીઓ સામે AMC ના દરોડાથી માધુપુરા માર્કેટ તેમજ આસપાસના ખાણીપીણીના વેપારીઓમાં ભારે ફફડાટ વ્યાપી ગયો છે. ફૂડ વિભાગ દ્વારા ફેલ થયેલા સેમ્પલોના આધારે વધુ જથ્થો જપ્ત કરવાની સાથે કાયદાકીય કાર્યવાહી હાથ ધરવામાં આવી રહી છે. પાલિકા તંત્રએ સ્પષ્ટ કર્યું છે કે, આગામી દિવસોમાં પણ તહેવારો અને સામાન્ય દિવસોમાં અન્ન સુરક્ષા જાળવવા આવી કડક ઝુંબેશ ચાલુ રાખવામાં આવશે.
આ કાર્યવાહી ફક્ત માધુપુરા પૂરતી મર્યાદિત નથી રહી, પરંતુ અમદાવાદ શહેરના અન્ય તમામ વિસ્તારોમાં પણ ઘીનું અને અન્ય ખાદ્યપદાર્થોનું મોટા પાયે વેચાણ કરતા એકમો પર AMC દ્વારા સતત ચાંપતી નજર રાખવામાં આવી રહી છે. ભવિષ્યમાં કોઈપણ પ્રકારનું નકલી કે અયોગ્ય ગુણવત્તાવાળું ઘી બજારમાં ગ્રાહકો સુધી ન પહોંચે તે સુનિશ્ચિત કરવા માટે ફૂડ વિભાગ દ્વારા આ ઝુંબેશને વધુ તેજ કરવામાં આવી છે.
તબીબો અને આરોગ્ય નિષ્ણાતો પણ ચેતવણી આપે છે કે નકલી ઘીના સેવનથી હૃદયરોગ, પાચનતંત્રની બીમારીઓ અને ફૂડ પોઇઝનિંગ જેવી ગંભીર સ્વાસ્થ્ય સમસ્યાઓ ઉદભવી શકે છે. તેથી ગ્રાહકોએ પણ ઘી કે અન્ય ખાદ્ય સામગ્રી ખરીદતી વખતે ખૂબ સાવચેતી રાખવી જોઈએ. હંમેશાં અધિકૃત, પેક્ડ અને સરકાર માન્ય પ્રમાણિત માર્કો ચકાસીને જ ખરીદી કરવાનો આગ્રહ રાખવો હિતાવહ છે. AMC ની આ સક્રિય કામગીરીથી શહેરના જાગૃત નાગરિકોમાં રાહતની લાગણી જોવા મળી રહી છે.