અમદાવાદ : અમદાવાદના ઠક્કરનગર વિસ્તારમાં ગેરકાયદેસર દારૂના મોટા રેકેટનો પર્દાફાશ થયો છે. શહેર પોલીસના ઝોન-5 એલસીબી અને કૃષ્ણનગર પોલીસે સંયુક્ત રીતે કાર્યવાહી કરીને એક મકાનમાં ચાલતી દારૂની મિની ફેક્ટરી ઝડપી પાડી છે. આ ઓપરેશન દરમિયાન 1.40 લાખનો મુદ્દામાલ જપ્ત કરવામાં આવ્યો છે અને મુખ્ય આરોપી બુટલેગર હેમલ ઉર્ફે હેમુ વાઘેલાની ધરપકડ કરવામાં આવી છે. અન્ય ત્રણ વોન્ટેડ આરોપીઓની શોધખોળ ચાલુ છે.
રિપોર્ટ મુજબ, શહેર પોલીસના ઝોન-5 એલસીબી અને કૃષ્ણનગર પોલીસની ટીમને બાતમી મળી હતી કે ઠક્કરબાપાનગરમાં હરિઓમ સાયકલની સામે આવેલી ગલીમાં મકાન નંબર 141માં બીજા માળે બે લોકો ભેગા મળીને સસ્તા બ્રાન્ડની દારૂની બોટલમાંથી મોંઘી બ્રાન્ડનો વિદેશી દારૂ બતાવીને વેચાણ કરી રહ્યા છે. જેના આધારે પોલીસની ટીમે દરોડો પાડતા હેમલ ઉર્ફે હેમુ વાઘેલા મળી આવ્યો હતો. પૂછપરછ કરતાં તેણે જણાવ્યું કે, તેના ભાગીદાર ભરત ઉર્ફે ભરતો સોલંકી અને વિજય હીરાભાઈ સોલંકી સાથે મળીને પોતાના આર્થિક ફાયદા માટે આ કૃત્ય કરતા હતાં.
આ દરોડા દરમિયાન તપાસ કરનાર પોલીસ અધિકારીઓને ચોંકાવનારી વિગતો મળી આવી હતી કે આરોપીઓ દ્વારા અસલી અને મોંઘી બ્રાન્ડની વિદેશી દારૂની ખાલી બોટલોમાં સસ્તો દારૂ ભરીને તેનું ગેરકાયદેસર રી-ફિલિંગ કરવામાં આવતું હતું. બજારમાં આશરે 1,500 રૂપિયાની કિંમત ધરાવતી બોટલોને બ્રાન્ડના નામે 5,000 રૂપિયાથી વધુ ઊંચા ભાવમાં વેચીનું કૌભાંડ ઝડપી પાડવામં આવ્યું છે.
પોલીસે ઘટનાસ્થળેથી વિવિધ પ્રકારની અસલી બ્રાન્ડની 47 નકલી ભરેલી બોટલો, 323 ખાલી બોટલો, 118 ક્વાર્ટર, 293 ઢાંકણાં, સ્ટીકરો તેમજ બિયરના ટીન સહિત કુલ 1.32 લાખ રૂપિયાથી વધુનો શંકાસ્પદ મુદ્દામાલ જપ્ત કર્યો છે. ઝડપાયેલા મુખ્ય આરોપી હેમલ વાઘેલાની પૂછપરછમાં ભરત સોલંકી, વિજય સોલંકી અને સુનિલ સોલંકી જેવા અન્ય નામો પણ બહાર આવ્યા છે. પોલીસ દ્વારા આ ગેરકાયદેસર નેટવર્ક સાથે સંકળાયેલા અન્ય મળતિયાઓની સંડોવણી વિશે ઊંડાણપૂર્વક તપાસ હાથ ધરવામાં આવી છે.