અમદાવાદ : અમદાવાદમાં નવરાત્રિ મહોત્સવ દરમિયાન ખેલૈયાઓ અને શહેરીજનોને ટ્રાફિક જામની સમસ્યાનો સામનો ન કરવો પડે તે માટે શહેર પોલીસ કમિશનરે ભારે વાહનોના પ્રવેશ પર નિયંત્રણ લાદતું જાહેરનામું બહાર પાડ્યું છે. આ જાહેરનામા મુજબ 11/10/2026 થી 21/10/2026 સુધી રોજેરોજ સવારે 8 વાગ્યાથી મોડી રાત્રે 2 વાગ્યા સુધી શહેરમાં ભારે અને નિર્ધારિત ક્ષમતાથી વધુ પેસેન્જર વાહનોના પ્રવેશ પર સંપૂર્ણ પ્રતિબંધ રહેશે.
અગાઉના જાહેરનામા અનુસાર 7500 કિ.ગ્રા.થી વધુ વજન ધરાવતા ગુડ્ઝ વાહનો, પેસેન્જર વાહનો અને ટ્રેક્ટર-ટ્રોલી પર સવારે 8 થી રાત્રે 11 વાગ્યા સુધી પ્રતિબંધ હતો, તેમજ 33થી વધુ પેસેન્જર ક્ષમતા ધરાવતી બસો પર સવારે 8 થી રાત્રે 10 વાગ્યા સુધી પ્રતિબંધ હતો. જો કે, નવરાત્રિ અને દશેરાના તહેવારોને ધ્યાને રાખી આ પ્રતિબંધનો સમય લંબાવીને રોજેરોજ સવારે 8 થી રાત્રે 2 વાગ્યા સુધી કરવામાં આવ્યો છે.ગરબાના રંગમાં રંગાયેલા નાગરિકો મોડી રાત્રે સરળતાથી અને સુરક્ષિત રીતે ઘરે પહોંચી શકે તે હેતુથી શહેરના મુખ્ય માર્ગો અને ગરબા સ્થળો પર રાત્રે 3 વાગ્યા સુધી પોલીસનો ચુસ્ત બંદોબસ્ત ગોઠવવામાં આવશે.
જાહેરનામાનો અમલ 21/10/2026ના રોજ રાત્રે 02 વાગ્યા સુધી રહેશે. ત્યારબાદ અગાઉના નિયમિત જાહેરનામાઓ આપોઆપ અમલમાં આવી જશે. પોલીસ કમિશનરેટ વિસ્તારમાં ફરજ બજાવતા જોઇન્ટ/એડિશનલ સીપીથી લઈને પોલીસ કોન્સ્ટેબલ સુધીના તમામ કર્મચારીઓને જાહેરનામાનો ભંગ કરનારા ચાલકો વિરુદ્ધ ગુનો નોંધી કાર્યવાહી કરવામાં આવશે.
આ ઉપરાંત એસ. જી. હાઇવે પર વાય.એમ.સી.એ.થી કર્ણાવતી ક્લબ તરફનો બંધ કરાયેલો 1.5 કિમીનો સર્વિસ રોડ પ્રથમ નોરતે જ વાહન વ્યવહાર માટે ખુલ્લો મૂકી દેવાશે. જેનાથી વાહનચાલકોને મોટી રાહત મળશે. તેમજ મોટા ગરબા સ્થળો અને મુખ્ય માર્ગોની આસપાસ વાહનોના ગેરકાયદે અને અવ્યવસ્થિત પાર્કિંગ સામે પોલીસે ઝુંબેશ ચલાવવાનો નિર્ણય કર્યો છે.