અમદાવાદ : શહેરના નાગરિકોને શુદ્ધ, ગુણવત્તાયુક્ત અને આરોગ્યપ્રદ ખાદ્ય પદાર્થો મળી રહે તે માટે AMC દ્વારા ફૂડ સેફ્ટી વિરુદ્ધ કડક અભિયાન ચલાવવામાં આવી રહ્યું છે. આ ઝુંબેશના ભાગરૂપે AMCના હેલ્થ ફૂડ વિભાગની ટીમે દાણીલીમડા વિસ્તારમાં આવેલ એક મોટા ખાદ્ય એકમ પર અચાનક દરોડો પાડીને કુલ 1,010 કિલો ખાદ્યસામગ્રીનો જથ્થો જપ્ત કરી સીલ કરવા સુધીની મોટી કાર્યવાહી કરી છે.
રિપોર્ટ મુજબ, AMC ફૂડ વિભાગ જણાવ્યા મુજબ, બાતમીના આધારે ટીમ દ્વારા દાણીલીમડાના શાલીમાર એસ્ટેટ અને ગુડલક એસ્ટેટ વચ્ચે આવેલા ગોડાઉન નંબર 4માં ધમધમતા ‘A.N. Gruh Udhyog’ ખાતે અધિકારીઓએ તપાસ હાથ ધરી હતી. આ તપાસ દરમિયાન એકમમાં ગંભીર પ્રકારની અનિયમિતતાઓ અને બેદરકારી સામે આવી હતી.ચેકિંગ દરમિયાન અનહાઈજેનિક કન્ડીશન જોવા મળી હતી અને ફુડસેફ્ટીની ગાઈડલાઈનનું પાલન કરવામાં આવતું ન હોવાનું જોવા મળ્યું હતું. ખાદ્યસામગ્રીના ઉત્પાદનમાં નોનપરમીટેડ કલરનો ઉપયોગ કરવામાં આવતો હોવાનું જોવા મળ્યું હતું.
એકમમાં ગંદકી અને અસુરક્ષિત રીતે બનાવવામાં આવતી ખાદ્ય સામગ્રીને ધ્યાને લઈને AMCની ટીમે મેંદો, મસાલા સિંગ, ઝીણી સેવ અને ફરસી પુરી સહિતનો કુલ 1010 કિલોગ્રામ શંકાસ્પદ અને અખાદ્ય જથ્થો સ્થગિત (સીઝ) કરી દીધો છે અને એકમને સીલ કરી દેવામાં આવ્યું હતું.
AMCના ફૂડ વિભાગ દ્વારા શહેરના તમામ ખાદ્ય વેપારીઓ અને એકમોના સંચાલકોને કડક ચેતવણી આપવામાં આવી છે કે તેઓ ખાદ્ય સુરક્ષા અને સ્વચ્છતાના નિયમોનું પાલન કરે, અન્યથા નાગરિકોના આરોગ્ય સાથે ચેડાં કરનાર સામે વધુ કડક પગલાં લેવામાં આવશે.