અમદાવાદ : અમદાવાદમાં નાગરિકોના આરોગ્ય માટે મ્યુનિસિપલ કોર્પોરેશન સક્રિય બન્યું છે. આરોગ્ય વિભાગ દ્વારા ચાલી રહેલી તપાસનો આ ત્રીજો દિવસ હતો. આ દરમિયાન શહેરના પોશ ગણાતા ગોતા વિસ્તારમાં કાર્યવાહી કરવામાં આવી હતી. ગોતા વિસ્તારમાં આરોગ્ય વિભાગ દ્વારા ફરી એકવાર મોટાપાયે ચાલતા નકલી ટોમેટો સોસના રેકેટનો પર્દાફાશ કરવામાં આવ્યો છે. આશરે 10,000 કિલો જેટલો નકલી અને ભેળસેળયુક્ત જથ્થો ઝડપી પાડવામાં આવ્યો છે.
રિપોર્ટ મુજબ, ગોતા રેલવે સ્ટેશન નજીક આવેલા મેલડી એસ્ટેટમાં ‘આઈ શ્રી ખોડિયાર ગૃહ ઉદ્યોગ’ નામના એકમમાં સોસ બનાવવામાં આવતો હોવાની માહિતી ફૂડ વિભાગને મળી હતી. તેના આધારે અધિકારીઓએ સ્થળ પર તપાસ કરતાં ટામેટાં સોસના નામે વેચાતો પદાર્થ અને તેને તૈયાર કરવા માટે વપરાતી સામગ્રી મળી આવી હતી.ફૂડ વિભાગે જથ્થો જપ્ત કરીને એકમને સીલ કર્યો છે. હવે સંબંધિત એકમ સામે દંડની કાર્યવાહી કરવામાં આવશે.
આરોગ્ય ટીમે તાત્કાલિક કડક પગલાં ભર્યા હતા. સ્થળ પરથી 10,000 કિલો નકલી સોસનો જથ્થો જપ્ત કરાયો હતો. આ બનાવટ અંગે આધાર મેળવવા તંત્ર સજ્જ બન્યું છે. અધિકારીઓ દ્વારા સોસના વિવિધ સેમ્પલ એકત્રિત કરવામાં આવ્યા છે. આ તમામ નમૂનાઓને પૃથક્કરણ માટે લેબોરેટરીમાં મોકલવામાં આવશે. જેથી તેમાં રહેલા તત્વોની ચોક્કસ વિગતો જાણી શકાય. લેબ અહેવાલ આવ્યા બાદ આગળની કાનૂની કાર્યવાહી કરવામાં આવશે.
આ રેકેટમાં સામે આવ્યું છે કે, ભેળસેળિયા વેપારીઓ ટોમેટો કેચઅપના બદલે ચટણીના નામે પોતાના ઉત્પાદનોનું વેચાણ કરતા હતા. આ એક પ્રકારની છટકબારી હતી, જેનાથી તેઓ ફૂડ સેફ્ટીના નિયમો અને કાયદાકીય ગૂંચવણોથી બચી શકતા હતા. આ નકલી સોસમાં હાનિકારક રંગો અને સ્વાસ્થ્ય માટે અયોગ્ય એવા ભળતા પદાર્થોનો ઉપયોગ કરવામાં આવતો હતો, જે ગ્રાહકોના આરોગ્ય માટે ગંભીર ખતરો ઉભો કરે છે.
મહત્વની વાત એ છે કે, અમદાવાદમાં ચીઝ અને પનીર જેવા ઉત્પાદનોમાં ભેળસેળની ઘટનાઓ સામાન્ય હતી, પરંતુ હવે ટોમેટો કેચઅપ જેવા રોજિંદા ઉપયોગમાં લેવાતા પદાર્થોમાં પણ ભેળસેળનું પ્રમાણ વધી રહ્યું છે. આશરે એક જ અઠવાડિયામાં દાણીલીમડા બાદ ગોતામાંથી નકલી ટોમેટો કેચઅપ બનાવવાનું આ બીજું મોટું યુનિટ ઝડપાયું છે, જે શહેરમાં ખાદ્ય પદાર્થોની ગુણવત્તા પર સવાલ ઉભા કરે છે.