અમદાવાદ : અમદાવાદના ન્યૂ રાણીપ વિસ્તારમાં સોસાયટીમાં મેન્ટેનન્સના પૈસા અને જમવાના કૂપનના મુદ્દે મારામારીની ઘટના સામે આવી છે. મળતી માહિતી મુજબ, સોસાયટીના મેન્ટેનન્સના નાણાં અને જમવાના કૂપનને લઈને થયેલી બબાલમાં સોસાયટીના ખજાનચી સાથે મારામારી કરવામાં આવી હતી. આ મામલે સ્થાનિક રહીશ સામે ફરિયાદ નોંધાવવામાં આવી છે. ઘટનાને પગલે સાબરમતી પોલીસે ગુનો નોંધી CCTV ફૂટેજ સહિતના પુરાવાના આધારે વધુ તપાસ હાથ ધરી છે.
રિપોર્ટ મુજબ, શહેરના ન્યૂ રાણીપ વિસ્તારમાં આવેલી શુકન સ્માઇલ સિટીમાં સોસાયટીના સભ્યો વચ્ચે મારામારીની ઘટના બની છે. સોસાયટીમાં રહેતા આલાપ શુક્લ નામના વ્યક્તિને સોસાયટીનુ મેન્ટનેન્સ બાકી હોવાથી સોસાયટીના સભ્યોએ જમવાની કૂપન આપી નહોતી. જેથી આલાપ શુક્લે ખજાનચી કનુ ચૌધરી અને અન્ય સોસાયટીના સભ્યો સાથે ખુલ્લા હાથની મારામારી કરી હતી.આ મારામારીની સમગ્ર ઘટના સીસીટીવી કેમેરામાં કેદ થઈ છે.આ ઘટના બાદ સોસાયટીના સભ્યોમાં ભારે રોષ જોવા મળી રહ્યો છે.
સમગ્ર મામલે સોસાયટીના ખજાનચી કનુભાઈ ચૌધરીએ સાબરમતી પોલીસ મથકમાં આલાપ શુક્લ સામે ફરિયાદ નોંધાવી છે. ફરિયાદમાં જણાવાયું છે કે, આરોપીએ મેન્ટેનન્સ ભરવાને બદલે અન્ય સભ્યો સાથે પણ ગેરવર્તન કરી હુમલો કર્યો હતો. હાલમાં સાબરમતી પોલીસે સીસીટીવી ફૂટેજ અને ફરિયાદના આધારે સમગ્ર મામલાની તપાસ હાથ ધરી છે અને આરોપી સામે કાયદેસરની કાર્યવાહી કરવાની પ્રક્રિયા શરૂ કરી છે.