અમદાવાદ : અમદાવાદ મ્યુનિસિપલ ટ્રાન્સપોર્ટ સર્વિસ (AMTS) દ્વારા જાહેર પરિવહન સેવાને વધુ સુવિધાયુક્ત અને લોકાભિમુખ બનાવવાના ભાગરૂપે મુખ્યમંત્રી ભૂપેન્દ્ર પટેલના હસ્તે AMTSના બે નવા બસ રૂટ અને એક વધારાની બસ સેવાનું લોકાર્પણ કરવામાં આવ્યું છે. આ ઉપરાંત, ઔડા વિસ્તારના વડીલ નાગરિકો માટે વિશેષ ‘નિઃશુલ્ક બસ પાસ યોજના’નો પણ આરંભ કરવામાં આવ્યો છે.
રિપોર્ટ મુજબ, જાહેર પરિવહન સેવાની વારંવાર કરાયેલી માંગણીઓ બાદ આખરે અમદાવાદ મ્યુનિસિપલ ટ્રાન્સપોર્ટ સર્વિસ (AMTS) દ્વારા બે નવા બસ રુટ શરુ કરવામાં આવ્યા છે. હવેથી વાડજથી પલસાણા અને થલતેજ મેટ્રો સ્ટેશનથી શેલા ગામ સુધી AMTSની લાલ બસ દોડશે. જેથી સ્થાનિકોને મોટી રાહત મળશે. વિસ્તારના લોકોની લાંબા સમયની માગણીને ધ્યાનમાં રાખીને શરૂ કરવામાં આવેલા આ નવા બસ રૂટ્સથી અંદાજે 10 લાખથી વધુ મુસાફરોને અવરજવરમાં મોટી રાહત મળશે.
રૂટ નંબર 45/1 થલતેજ મેટ્રો સ્ટેશનથી શેલા ગામ, રૂટ નંબર 71/2 વાડજ ટર્મિનસથી પલસાણા ગામના નવા રૂટ શરૂ કરાયા છે. જ્યારે રૂટ નંબર 503 અડાલજથી કલોલ ઇન્સ્ટિટ્યૂટ કોલેજ વધારાની બસ સેવા શરૂ કરાઈ છે. આ નવા રૂટ શરૂ થવાથી શેલા, પલસાણા, અડાલજ અને કલોલ તરફ જતાં દૈનિક મુસાફરો, વિદ્યાર્થીઓ અને સ્થાનિક નાગરિકોને સીધો ફાયદો થશે.
અત્યાર સુધી અમદાવાદ મનપા વિસ્તારની હદમાં રહેતા સિનિયર સિટીઝન્સને જ એએમટીએસ બસમાં મફત મુસાફરીનો લાભ પ્રાપ્ત થતો હતો. પરંતુ હવે મનપાએ નિયમોમાં સુધારો કરતા, ઔડાની હદમાં વસવાટ કરતાં 65 વર્ષ કે તેથી વધુ વયના વડીલોને પણ મફત મુસાફરી પાસ આપવાની જાહેરાત કરવામાં આવી છે. જેનાથી હજારો વડીલોને રાહત રહેશે.
વર્ષોથી રિંગ રોડ આસપાસના વિસ્તારોમાં રહેતા લોકોને જાહેર પરિવહન સેવાના અછતને કારણે મોંઘા ભાડા ખર્ચીને રિક્ષા કે ટેક્સીમાં મુસાફરી કરવી પડતી હતી. આ નવા રૂટ શરૂ થવાથી શેલા, વાડજ, પલસાણા અને કલોલ તરફ જતા દૈનિક મુસાફરો, વિદ્યાર્થીઓ અને નોકરિયાતોને મોટી આર્થિક રાહત મળશે.
નવી બસ સેવાનો રુટ
સ્થાનિક રહીશોને સિટી બસ સુવિધા સરળતાથી મળી રહે તે માટે મ્યુનિસિપલ તંત્ર દ્વારા નીચે મુજબના રૂટ શરૂ કરાયા છે:
રૂટ નં. 71/2: વાડજ ટર્મિનસથી નીકળીને પલસાણા ગામ સુધી સેવા આપશે.
રૂટ નં. 45/1: થલતેજ મેટ્રો સ્ટેશનથી ઉપડીને ઈસ્કોન અને YMCA ક્લબ થઈને શેલા ગામ સુધી જશે.
રૂટ નં. 503 (વધારાની બસ): વિદ્યાર્થીઓ અને નોકરિયાતોની સુવિધા માટે અડાલજથી કલોલ ઈન્સ્ટિટ્યુટ કોલેજ સુધી 503 નંબરની વધારાની બસ દોડાવવાનો નિર્ણય લેવાયો છે.
(આ બંને નવા રૂટ પર દર 10 થી 12 મિનિટે મુસાફરો માટે બસ ઉપલબ્ધ રહેશે)