અમદાવાદ : અમદાવાદને એક નવી ઓળખ આપવા માટે બોડકદેવના સિંધુ ભવન રોડ પર ‘અમદાવાદ સિટી સ્ક્વેર’ વિકસાવવાનું આયોજન કરવામાં આવ્યું છે. અમદાવાદ શહેરની આગવી ઓળખ ઊભી થાય અને લોકોને એક જ સ્થળે મનોરંજન, ખરીદી, ખાણીપીણી અને સાંસ્કૃતિક પ્રવૃત્તિઓનો અનુભવ મળી રહે તે હેતુથી આ પ્રોજેક્ટનું આયોજન કરવામાં આવ્યું છે.
રિપોર્ટ મુજબ, અમદાવાદ મ્યુનિસિપલ કોર્પોરેશન (AMC) દ્વારા તૈયાર કરવામાં આવનારા આ પ્રોજેક્ટમાં અંદાજે 175 મીટર ઊંચો આઇકોનિક ટાવર બનાવવામાં આવશે. આ ટાવર પર સ્કાય ડેક અને સ્કાય વોકની સુવિધા હશે, જ્યાંથી અમદાવાદ શહેરનો સુંદર નજારો જોઈ શકાશે. આ ઉપરાંત, પ્રોજેક્ટમાં રેસ્ટોરન્ટ, કેફે, આર્ટ ગેલેરી, ફૂડ કોર્ટ, દુકાનો, ગાર્ડન અને મનોરંજન માટેની વિવિધ સુવિધાઓ ઊભી કરવામાં આવશે.
અમદાવાદ મ્યુનિસિપલ કોર્પોરેશને સિંધુ ભવન રોડ પર રૂ.570 કરોડના ખર્ચે 175 મીટર ઊંચો આઇકોનિક અમદાવાદ સિટી સ્ક્વેરક્ર પ્રોજેક્ટ બનાવવાનું આયોજન કર્યું છે. કુલ 13,144 ચો.મી. પ્લોટમાંથી 12,091 ચો.મી.માં બાંધકામ થશે. ત્રણ બેઝમેન્ટમાં 385 કાર, 1109 ટુ-વ્હીલર તથા સામે વધારાની 450 કારનું પાર્કિંગ રહેશે. 50 દુકાનો, આર્ટ ગેલેરી, 40 મીટરે 1200 લોકોની ક્ષમતાવાળી બે માળની રેસ્ટોરન્ટ, ટેરેસ કેફે, 175 મીટરે સ્કાય ડેક-વોક, 17 લિફ્ટ, સોલર ટ્રી અને અર્બન પ્લાઝા બનશે.
આ પ્રોજેક્ટનું સૌથી મોટું આકર્ષણ ટાવરની ટોચ પર બનાવવામાં આવનારી સ્કાય ડેક અને સ્કાય વોકની સુવિધા હશે. આશરે 175 મીટરની ઊંચાઈએ વિકસાવવામાં આવનારી વ્યુ ગેલેરીમાંથી અમદાવાદનો પેનોરેમિક નજારો જોઈ શકાશે.સ્કાય ડેક પર એકસાથે આશરે 75 લોકો માટે વ્યવસ્થા કરવાનું આયોજન છે. જોકે, પ્રોજેક્ટની અન્ય વિગતોમાં વ્યુ ગેલેરીની ક્ષમતા 50 મુલાકાતીઓ દર્શાવવામાં આવી છે. અંતિમ આયોજનમાં આ અંગે સ્પષ્ટતા થવાની રહેશે.
આમ, ‘અમદાવાદ સિટી સ્ક્વેર’ પ્રોજેક્ટમાં પાર્કિંગ, ખરીદી, ખાણીપીણી, કલા, સંસ્કૃતિ અને મનોરંજન સહિતની વિવિધ સુવિધાઓ એક જ સ્થળે ઊભી કરવાનું આયોજન છે. પ્રોજેક્ટ સાકાર થયા બાદ સિંધુ ભવન રોડ પર અમદાવાદનું નવું આકર્ષણ ઊભું થઈ શકે છે અને શહેરની આધુનિક ઓળખને વધુ મજબૂતી મળી શકે છે.
અમદાવાદ મ્યુનિસિપલ કોર્પોરેશન દ્વારા આ પ્રોજેક્ટ માટે 25 ઓક્ટોબર, 2026ના રોજ ટેન્ડર પ્રસિદ્ધ કરવામાં આવ્યું છે. પ્રોજેક્ટમાં રસ ધરાવતા કોન્ટ્રાક્ટરોને તેની વિગતો સમજાવવા માટે ઓરિએન્ટેશન મીટિંગ યોજવાનું આયોજન છે. ટેન્ડર પ્રક્રિયા પૂર્ણ કરતાં પહેલાં બે પ્રિ-બિડ મીટિંગ પણ યોજવામાં આવશે, જેથી યોગ્ય કોન્ટ્રાક્ટરની પસંદગી કરી શકાય.