અમદાવાદ : અમદાવાદના પશ્ચિમ વિસ્તારમાં રહેતા લોકો માટે મહત્વના સમાચાર છે. શહેરના પશ્ચિમ વિસ્તારમાં જુહાપુરા અંબર ટાવર રોડ પર લાઈન શિફ્ટિંગ અને લીલાપુર તળાવ પાસે નવા સ્પીડલ રોડની કામગીરીના કારણે જાસપુર વોટર ટ્રીટમેન્ટ પ્લાન્ટમાંથી પાણીનો સપ્લાય 16 નવેમ્બરના રોજ સવારે 8:00 વાગ્યા બાદ બંધ કરી દેવામાં આવશે.આ કામગીરી પૂર્ણ થયા બાદ બીજા દિવસે 17 નવેમ્બરે સવારે ઉપલબ્ધ પાણીના જથ્થા મુજબ પાણી આપવામાં આવશે.
AMC ના ઈજનેર વોટર પ્રોજેકટના જણાવ્યા મુજબ, જાસપુર 200 એમએલડી વોટર ટ્રીટમેન્ટ પ્લાન્ટ આધારીત ટ્રક મેઈન લાઈન પૈકી લીલાપુર ગામ પાસે આવેલા લીલાપુર તળાવ પાસેના 1300 મીમી વ્યાસના સ્કાવર વાલ્વનો સ્પીડલ રોડ ખરાબ થયેલો હોવાથી નવો સ્પીડલ રોડ નાખવાની કામગીરી તથા સરખેજ નેશનલ હાઇવે-કેડીલા સર્કલથી એ.પી.એમસી. તરફ જતી 750 મીમી વ્યાસની એમ.એસ. ટ્રંક મેઈન લાઈન પર અંબર ટાવર-ક્લાસિક હોમ પાસે ડ્રેનેજ રી-હેબની કામગીરીમાં નડતરરૂપ લાઈન શિફટીંગની કામગીરી કરવાની છે. જેથી 16 નવેમ્બરે પાણીની સપ્લાય શટડાઉન થશે.
ઉત્તર પશ્ચિમ ઝોનમાં અસરગ્રસ્ત વિસ્તારો:
ગોતા વોર્ડના ગોતા TP-55 વિસ્તાર
બોડકદેવ વોર્ડનો રાજપથ TP-50 વિસ્તાર
થલતેજ વોર્ડના ભાડજ TP-409 વિસ્તાર
હેબતપુર TP-53/A વિસ્તાર
શીલજ ગામ
બોપલ-ઘુમા વિસ્તાર
દક્ષિણ પશ્ચિમ ઝોનમાં અસરગ્રસ્ત વિસ્તારો:
સરખેજ-મકતમપુરા વોર્ડનાં તમામ વોટર ડિસ્ટ્રિબ્યુશન સ્ટેશન
સમગ્ર સરખેજ વિસ્તાર
જુહાપુરા વિસ્તાર
આ વિસ્તારોમાં 16 નવેમ્બરની સવારના પાણી પુરવઠા બાદના તમામ નિર્ધારિત સપ્લાય બંધ રહેશે.
17 નવેમ્બરથી પાણી પુરવઠો શરૂ થશે
મ્યુનિસિપલ કોર્પોરેશન દ્વારા જણાવ્યા મુજબ, કામગીરી પૂર્ણ થયા બાદ 17 નવેમ્બરે પાણીનો પુરવઠો ફરી શરૂ કરવામાં આવશે. જોકે, તે દિવસે પાણી ઉપલબ્ધ જથ્થા પ્રમાણે આપવામાં આવશે. તેથી અસરગ્રસ્ત વિસ્તારોના રહેવાસીઓને સોમવાર માટે પાણીનો જરૂરી સંગ્રહ કરી રાખવા સૂચન છે.