ગાંધીનગર : દિવાળી અને નવા વર્ષના પર્વ નિમિત્તે ગુજરાત ભાજપ દ્વારા આજે પ્રદેશ કક્ષાના સ્નેહમિલન સમારોહનું આયોજન કરવામાં આવ્યું હતું. ગાંધીનગર ખાતે ભાજપના પ્રદેશ કાર્યાલય કમલમ્ ખાતે નૂતન વર્ષ સ્નેહમિલન કાર્યક્રમ યોજાયો હતો. આ કાર્યક્રમમાં મુખ્યમંત્રી ભૂપેન્દ્ર પટેલ, ગુજરાત ભાજપના પ્રદેશ પ્રભારી તરુણ ચુઘ અને પ્રદેશ પ્રમુખ જગદીશ વિશ્વકર્મા સહિતના આગેવાનો ઉપસ્થિત રહ્યા હતા. આ પ્રસંગે ભાજપના પદાધિકારીઓ, કાર્યકરો અને શુભેચ્છકોએ એકબીજાને નૂતન વર્ષની શુભકામનાઓ પાઠવી હતી. આ સાથે જ નવા વર્ષમાં સંગઠનને વધુ મજબૂત બનાવવા માટે મુખ્યમંત્રી ભુપેન્દ્ર પટેલે કાર્યકરોને એક ખાસ સંદેશ આપ્યો છે.
કાર્યકરોને નૂતન વર્ષની શુભેચ્છા પાઠવતાં CM ભૂપેન્દ્ર પટેલે જણાવ્યું હતું કે, વર્ષ દરમિયાન કોઈનામાં વધઘટ કે મનદુઃખ થયાં હોય તો ફરી એકસાથે મળીને સ્નેહ જાળવવાનો આ અવસર છે. ભાજપ પર પ્રજાએ જે વિશ્વાસ અને સ્નેહ મૂક્યો છે તેને વધુ મજબૂત બનાવવાનો સંકલ્પ આ સ્નેહમિલનમાં લેવાનો છે. જ્યાં હજુ અંધારું હોય ત્યાં આપણા વિકાસનો દીપક પ્રગટાવીએ અને વધુમાં વધુ લોકોનો પ્રેમ કેવી રીતે જીતી શકાય તે દિશામાં કામ કરીએ.તેમણે વધુમાં જણાવ્યું હતું કે, જે કોઈ અસંતુષ્ટ હોય તેને સંતુષ્ટ કેવી રીતે કરી શકાય તેવો સંકલ્પ પણ લેવો જોઈએ.
ભાજપના પ્રદેશ પ્રમુખ જગદીશ વિશ્વકર્માએ નૂતન વર્ષની શુભકામનાઓ પાઠવતાં જણાવ્યું હતું કે, ‘વડાપ્રધાન નરેન્દ્ર મોદીના જાહેર જીવન અને રાષ્ટ્રસેવાના 25 વર્ષ પૂર્ણ થવા એ આ વર્ષને વિશેષ બનાવે છે. ભાજપના કાર્યકરો સતત પ્રજાની વચ્ચે રહીને સામાન્ય પરિવારોના જીવનમાં વિકાસના દીવા પ્રગટાવવાનું કામ કરે છે.’ તેમણે જાહેરાત કરી હતી કે, આગામી 22 નવેમ્બરના રોજ ગુજરાતની તમામ 182 વિધાનસભા બેઠકો પર નૂતન વર્ષ સ્નેહમિલન કાર્યક્રમો યોજાશે. નવા વર્ષમાં સંગઠન અને જનસંપર્કને વધુ મજબૂત બનાવવાના સંકલ્પ સાથે ભાજપના નેતાઓએ કાર્યકરોને સક્રિય કામગીરી કરવા હાકલ કરી હતી.
આગામી 22 નવેમ્બરે તમામ વિધાનસભા ક્ષેત્રોમાં સ્નેહમિલન કાર્યક્રમો યોજવાની તૈયારી વચ્ચે આજના કાર્યક્રમમાં ધારાસભ્યોની હાજરી પણ ધ્યાન ખેંચનારી રહી હતી. આમંત્રણ હોવા છતાં મોટાભાગના ધારાસભ્યો અને અમુક મંત્રીઓ હાજર રહ્યા નહોતા. ગણતરીના ધારાસભ્યો અને તેમના જૂથના કાર્યકરો જ કાર્યક્રમમાં જોવા મળ્યા હતા.


