અમદાવાદ : એક તરફ AMC દ્વારા ટેક્સધારકો દ્વારા વર્ષોથી બાકી ટેક્સની રકમ ન ભરતાં કરોડોની બાકી રકમ વસૂલવા માટે ટેક્સ વિભાગ દ્વારા મેગા સિલિંગ ઝૂંબેશ શરૂ કરવામાં આવી છે. ત્યારે લોકો સરળતાથી ટેક્સ ભરી શકે તેના માટે ટેક્સ કલેક્શન વાન મૂકવામાં આવી છે. 31 માર્ચ સુધીમાં વ્યાજ માફીની સ્કીમ લાગૂ કરવામાં આવી છે.શુક્રવારે AMC દ્વારા 14118 જેટલી મિલકતોને સીલ કરાઈ હતી.
અમદાવાદના ત ઝોનમાં ઝોન વાઈઝ એક એમ કુલ સાત જેટલી ટેક્સ કલેક્શન વાન મુકાઈ છે જે ઘરે ઘરે અને સોસાયટીઓમાં ફરીને જો ટેક્સ ભરવો હોય તો વ્યાજ માફીની સ્કીમ માટે માઈકમાં જાહેરાત કરી અને લોકોને જણાવવામાં આવે છે. વર્ષ 2022-23ની ચાલુ નાણાકીય વર્ષની આજ દિન સુધીની ટેક્સની રૂ.1574 કરોડ આવક થઈ છે. 31 માર્ચ સુધી કોર્પોરેશનના સિવિક સેન્ટર રજાના દિવસે પણ ચાલુ રહેશે.
શુક્રવારે મેગા સિલિંગ ઝૂંબેશ અંતર્ગત એક જ દિવસમાં AMC દ્વારા 14118 જેટલી મિલકતોને સીલ કરવામાં આવી છે અને રૂ.18.05 કરોડની આવક થઈ છે. મેગા સિલિંગ ઝૂંબેશ અંતર્ગત સૌથી વધારે પૂર્વ ઝોનમાં 4565 જેટલી મિલકતોને સીલ કરવામાં આવી છે. આગામી દિવસોમાં પણ AMC દ્વારા આ મેગા સિલિંગ ઝૂંબેશ યથાવત રહેશે તેમ રેવન્યુ કમિટીના ચેરમેન જૈનિક વકીલે જણાવ્યું હતું.