અમદાવાદ :સામાન્ય રીતે રીઢા ગુનેગારો ચેઇન સ્નેચિંગ જેવી ઘટનાઓને અંજામ આપતા હોય તેવા અનેક કિસ્સાઓ સામે આવ્યાં છે. પરંતુ શહેરના નરોડા વિસ્તારમાં એક SRPનો જવાન જ ચેઇન સ્નેચિંગ કરતાં ઝડપાયો છે. મહીલાની ચેઇન ખેંચીને ભાગવા જતાં SRPના જવાનને લોકોએ ઝડપી લીધો હતો.ત્યારબાદ પોલીસને જાણ કરતા નરોડા પોલીસ ઘટનાસ્થળે પહોંચી હતી. પૂછપરછ કરતા જાણવા મળ્યું હતું કે ચેઇન સ્નેચિંગ યુવક પોતે પોલીસ કર્મચારી છે.
નરોડા ગામના પ્રજાપતિ વાસમાં રહેતા હંસાબેન પ્રજાપતિ સુમારે સાંજે સાડા પાંચ વાગ્યાની આસપાસ નરોડા પોલીસ સ્ટેશનની પાસે આવેલી રાજચંદ્ર સોસાયટી પાસેથી ચાલતા પસાર થતા હતા. તે દરમિયાન બાઇક લઈને એક શખસ આવ્યો હતો અને તેણે હંસાબેનના ગળામાં રહેલી ચેઈન ઝુંટવી લીધી હતી. જોકે મહિલાએ બૂમાબૂમ કરતા લોકો એકઠા થઇ ગયા હતા ચેઇન ઝૂંટવીને ભાગી રહેલા અમિતને પકડી પડ્યો હતો. ત્યાંથી પસાર થયા ટ્રાફીક પોલીસના જવાને પોલીસને જાણ કરતા પોલીસે મહિલાની ફરિયાદને આધારે અમિત પરમારની ધરપકડ કરી હતી.
પ્રાપ્ત એક રિપોર્ટ મુજબ પોલીસે અમિત પરમારની પૂછપરછ કરતાં ચોકાવનારી વિગતો સામે આવી હતી. અમિત પરમાર SRPમાં પોલીસ કોન્સ્ટેબલ તરીકે નોકરી કરે છે અને નોકરીમાં ત્રણ દિવસની રજા મુકીને ચેઇન સ્નેચિંગ કરવા અમદાવાદ આવ્યો હતો. અમિતને દેવું થઈ ગયું હોવાથી રૂપિયાની જરૂર હોવાથી તેને તાત્કાલિક રૂપિયા મેળવવા આ શોર્ટકટ અપનાવ્યો હતો પણ પોલીસને હાથે પકડાઈ ગયો. પોલીસ તપાસમાં સામે આવ્યું છે કે અમિત પરમાર પર ભૂતકાળમાં કોઈ ફરિયાદ નોંધાઈ નથી.
હાલ તો પોલીસે મહિલાની ફરિયાદને આધારે અમિત પરમારની ધરપકડ કરી છે. જોકે પોલીસ હવે એ પણ તપાસ કરી રહી છે કે આરોપી અમિતે અગાઉ કોઈ આવી ઘટનાને અંજામ આપ્યો છે કે કેમ. જો અમિત ત્રણ દિવસ અમદાવાદ આવ્યો હોય તો કોઈ મોટી ચોરી કે લૂટ જેવી ઘટનાને અંજામ આપવાનો પ્લાન હતો કે કેમ તે અંગે પણ તપાસ હાથ ધરી છે.