અમદાવાદ : રાજ્યભરમાં રખડતા ઢોરોનો ત્રાસ છે. દરરોજ અનેક લોકોને તે હડફેટે લઈ રહ્યા છે અને લોકોના અકસ્માત થઈ રહ્યા છે. ક્યારેક વાહનના હડફેટે આવે છે તો ક્યારેક ચાલતા લોકોને હડફેટે લઈ ઇજાગ્રસ્ત કરે છે. ત્યારે રખડતા ઢોરે વધુ એક નાના બાળકને હડફેટે લેવાની વધુ એક ઘટના સામે આવી છે. રાણીપમાં એક ગાયે બાળકનો પીછો કરી અડફેટે લીધો હતો. ગાય બાળકની પાછળ દોડતા દાદીએ બાળકને બચાવ્યો હતો. દાદીના આ હિમ્મતભર્યા કાર્યને લોકો બિરદાવી રહ્યા છે.
પ્રાપ્ત વિગતો મુજબ રાણીપના બલોલનગર પાસે આવેલ સુંદરવન ફ્લેટ પાસે આ બનાવ બન્યો હતો. જ્યાં ફ્લેટની અંદર રખડતા ઢોર આવી જતા બનાવ બન્યો હતો. ઢોરે ફ્લેટમાં અંદર રમતા બાળકને અડફેટે લઈને બાળક પર હુમલો કર્યો હતો. સદ્દનસીબે બાળકને ઇજા પહોંચી નથી. જ્યારે વૃદ્ધ દાદીને સામાન્ય ઇજા પહોંચી છે. બાળકના દાદીએ બાળકને બચાવ્યો હતો.
એક તરફ શહેરમાં રખડતા ઢોરને લઈ કાર્યવાહી કરવામાં આવી રહી છે. પરંતુ પશ્ચિમ વિસ્તારમાં રખડતા ઢોરો હજી પણ રોડ ઉપર જોવા મળે છે.હવે સોસાયટી અને ફલેટોની અંદર પણ રખડતા ઢોર જોવા મળી રહ્યા છે.