અમદાવાદ : અમદાવાદના આંબાવાડી વિસ્તારમાં કન્સ્ટ્રક્શન સાઈટ પર મોટી દુર્ઘટનાના અહેવાલ સામે આવ્યા છે. જેમાં કામ દરમિયાન અચાનક ભેખડ ધસી પડતા એક બાળકી અને મજૂર દટાયા હતા. આ ઘટનામાં બાળકીનું મોત નિપજ્યું છે જ્યારે મજૂર ઈજાગ્રસ્ત થતા તેને સારવાર અર્થે ખસેડાયો હતો. એચ.આર.કન્સ્ટ્રક્શન ગ્રૂપ દ્વારા બિલ્ડીંગ બનાવવામાં આવતું હતું,
પ્રાપ્ત વિગતો મુજબ આંબાવાડી વિસ્તારમાં એચ.આર ગ્રુપ કન્સ્ટ્રક્શન સાઈટ પર બેઝમેન્ટ પાર્કિંગનું કામ ચાલતું હતું ત્યારે અચાનક ભેખડ ધસી પડતા એક બાળકી અને મજૂર તેમાં દટાયા હતા. ઘટનાને પગલે અન્ય મજુરો તાત્કાલિક દોડી આવ્યા હતા. ઘટનામાં દટાયેલા લોકોને બચાવવા માટે પ્રયાસ હાથ ધરાયા હતા. આ ઘટનામાં એક બાળકીનું ઘટના સ્થળે જ મોત નિપજ્યયું હતુ. જ્યારે અન્ય મજુરો ઈજાગ્રસ્ત થતા તેમને સારવાર અર્થે હોસ્પિટલ ખસેડાયા હતા. આ ઘટનાની જાણ એલીસબ્રિજ પોલીસને થતા પોલીસે ઘટનાં સ્થળે પહોંચી કાર્યવાહી હાથ ધરી છે.
આ સમગ્ર ઘટનાનો ઢાંક પીછોડો કરવા માટે સ્થાનિક પોલીસ તેમજ ફાયરબ્રિગેડને ઘટનાની જાણ કરાઈ ન હોવાનું કહેવામાં આવી રહ્યું છે. બિલ્ડર દ્વારા આ ઘટનાને છુપાવવા માટે મજુર શ્રમિક પરિવારને બારોબાર હોસ્પિટલ લઈ જવાયો હોવાનું જણાવવામાં આવી રહ્યું છે. હાલ તો પોલીસે ઘટના સ્થળે પહોંચી આ મામલે કાર્યવાહી હાથ ધરી છે.