અમદાવાદ : ભ્રષ્ટાચારીઓએ માઝા મૂકી હોય એમ લાંચની માંગણી કરી રહ્યા છે. તો બીજી તરફ રાજ્યના ગૃહ વિભાગે આવા ભ્રષ્ટાચારીઓને ઝડપી લેવા માટે અભિયાન ચલાવ્યુ હોય એમ ભ્રષ્ટાચારીઓને ઝડપવામાં આવી રહ્યા છે. અમદાવાદના ધોળકા રુરલ પોલીસ સ્ટેશનનો ASI લાંચ લેતા ઝડપાયો હતો. આરોપી આસીસ્ટન્ટ સબ ઈન્સપેક્ટરે એક પ્રેમી જોડુ ફરાર થઈ જવાના કેસમાં આરોપી યુવકને રજુ કરવા માટે થઈને લાંચ માટે શરુઆતમાં 5 થી 7 લાખ રુપિયાની રકમ માંગી હતી. અંતે બે લાખ રૂપિયામાં આ કેસની પટાવટ કરવાનું નક્કી કર્યું હતું. જોકે ફરિયાદી આ કેસમાં લાંચ નહીં આપવા માંગતા હોય ACBનો સંપર્ક કરી ACBએ છટકુ ગોઠવી રૂપિયા બે લાખની લાંચ લેતા ASI કરણસિંહ ગોહિલ અને માજી સરપંચ ઈશ્વર ઠાકોરને પકડી પડ્યા હતા.
પ્રાપ્ત રિપોર્ટ મુજબ, થોડા સમય પહેલા ફરિયાદીના ભત્રીજાએ બાજુના ગામમાં રહેતી છોકરીને ભગાડી લઈ ગયેલો હતો. તે દરમિયાન અસલાલી પોલીસ સ્ટેશનમાં દીકરીના પિતાએ પોકસોની કલમ હેઠળ ફરિયાદ દાખલ કરાવવા અસલાલી પોલીસ સ્ટેશનમાં અરજી કરી હતી. બીજી તરફ આ કેસમાં છોકરાં વિરુદ્ધ પોકસોની ફરિયાદ દાખલ ન થાય અને ફરિયાદીના ભત્રીજાને પોલીસ સમક્ષ હાજર કરવા માજી સરપંચ ઈશ્વર ઠાકોરને ભલામણ કરી હતી. જોકે માજી સરપંચ ઈશ્વર ઠાકોર સ્થાનિક આગેવાન હોવાથી આ કેસ આગળ ન વધે તેના માટે ASI કરણ ગોહિલને વાત કરી દીકરીના પિતાને વાત કરીને કેસમાંથી બચાવી લેવા અને કેસની પતાવટ કરાવવામાં મધ્યસ્થી કરવા કહ્યું હતું. પરંતુ ઈશ્વર ઠાકોર માજી સરપંચે આ સમાધાન કરાવવા અને છોકરીને કાસીન્દ્રા ખાતે રજુ કરવા માટે લઈ ગયા હતા.
બાદમાં છોકરાને પણ પકડી લઈ રજૂ કરવાની જવાબદારી લીધી હતી. પરંતુ છોકરાને પોકસોના કેસમાં બચાવી લેવા અને અસલાલી પોલીસ સ્ટેશનમાં આ કેસની પતાવટ કરાવવા બંને આરોપીઓએ આ કેસના ફરિયાદી પાસેથી પાંચથી સાત લાખ રૂપિયા ખર્ચો થાય તે કરવા વાતચીત કરી હતી અને આખરે રૂપિયા બે લાખમાં ડીલ નક્કી કરી લાંચની માંગણી કરી હતી. પરંતુ ફરિયાદી આ લાંચની રકમ આપવા માંગતા નહોતા જેને પગલે ACBનો સંપર્ક કરતા ફરિયાદીની ફરિયાદ આધારિત સોમવારે છટકું ગોઠવ્યુ હતું. અને ધોળકા વિસ્તારમાં જ્યાં રૂપિયાની લેવડદેવડ કરવાનું ફરિયાદી સાથે આરોપીઓએ નક્કી કર્યું હતું. તે અંગે ACB ટીમે હેતુલક્ષી વાતચીત કરાવી નાણાં સ્વીકારતા રંગે હાથ ઝડપી લીધા હતા. હાલ બંને આરોપીઓની ACBએ અટકાયત કરી ગુનો દાખલ કરીને કાયદેસરની કાર્યવાહી હાથ ધરી છે.