અમદાવાદ: અમદાવાદમાં ડમ્પર ચાલકો બેફામ રીતે ડ્રાઈવિંગ કરીને અન્યોની જિંદગી જોખમમાં મુકી રહ્યાં છે. અમદાવાદ શહેરમાં AMCના કચરો લઈને જતા ડમ્પરે ફરી એકવાર અકસ્માત સર્જ્યો હોવાની ઘટના સામે આવી છે. મળતા રિપોર્ટ પ્રમાણે જશોદાનગર ચાર રસ્તા પર Amcના કચરો લઈને જતા ડમ્પરે કેડિલા ઓવરબિજના છેડે ઉતરતા છ વાહનોને અડફેટે લીધા હતા.આ અકસ્માતની ઘટનામાં એક વ્યક્તિનું મોત અને બે વ્યક્તિઓને ઈજા થવા પામી છે, જેમા એક મહિલાનો હાથ કચડાયો છે.
પ્રાપ્ત વિગતો મુજબ આજે AMCના કચરો લઈને જતા ડમ્પરે આતંક મચાવતા કેડિલા ઓવરબિજના છેડે ઉતરતા છ વાહનોને અડફેટે લીધા હતા, જેમાં બે કાર અને રિક્ષા સાથે ત્રણ બાઈકોને અડફેટે લીતા ગંભીર અકસ્માતની ઘટના બનવા પામી છે. અકસ્માતની ઘટનામાં એક વ્યક્તિનું સારવાર દરમ્યાન મોત ણ બે વ્યક્તિઓને ઈજા થવા પામી છે, જેમા એક મહિલાનો હાથ કચડાયો છે.અકસ્માતની ઘટના બાદ ડમ્પરચાલક ટોળામાંથી નાસવા જાય તે પહેલા લોકોએ તેને ઝડપી પાડીને પોલીસને સોંપી દીધો હતો. ઈજાગ્રસ્તોને 108માં હોસ્પિટલ ખાતે લઈ જવાયા છે જ્યાં એકની હાલત નાજુક હોવાનું કહેવાઈ રહ્યું છે.
ઉલ્લેખનીય છે કે, ડમ્પરે વાહનોને 100 ફુટ સુધી ઢસડતા વાહનચાલકોએ બુમો પાડીને તેને રોક્યો હતો. ત્યારબાદ રોષે ભરાયેલા લોકોએ ડમ્પર ચાલક પર પથ્થરમારો કર્યો હતો. બચવા માટે ભાગવાનો પ્રયાસ કરનાર ડમ્પર ચાલકને લોકોએ પકડી પાડ્યો અને પોલીસના હવાલે કર્યો હતો. અકસ્માતની ઘટના બાદ લોકોના ટોળેટોળા એકઠા થતા જશોદાનગર ચાર રસ્તા પર ભારે ટ્રાફિક જામ થયો હતો.
તમને જણાવી દઈએ કે, આ અગાઉ અમદાવાદના ઓઢવ વિસ્તારમાં અમદાવાદ મહાનગરપાલિકાની કચરો ભરવાની ગાડીએ બાઇકને ટક્કર મારતા બાઇક સવારનું મોત થયું હતું જે બાદ ફરી અમદાવાદ AMCની ગાડીએ અકસ્માત સર્જ્યો છે ત્યારે અમદાવાદ AMCના વાહનોની ઝડપ પર લગામ લાગે તે જરૂરી છે.