અમદાવાદ : અમદાવાદને રવિવારે મેઘરાજાએ પાંચ-પાંચ ઇંચ વરસાદ સાથે તરબોળ કરી દેતા અમદાવાદ જાણે સ્વિમિંગ પૂલ બન્યું હતું. તેની સાથે મેઘરાજાએ પ્રી-મોનસૂન પ્લાનને જાણે કહી દીધુ હતુ ‘બાય’. અમદાવાદમાં સીઝન જામવાની સાથે તંત્રની પોલ ખુલ્લી પડી ગઈ હતી. શહેરમાં પડેલા પાંચ ઇંચ વરસાદે પ્રી-મોનસૂન પ્લાન કોહલીની જેમ ધોઈ નાખ્યો હતો.
અમદાવાદ RTO ને જોડતા 132 ફૂટ રોડ જળ બંબાકાર સ્થિતિમાં આવી ગયો છે. શહેરમાં અનેક લોકોના વાહનો ખોટવાયા છે. વાહન ચાલકોને હાલાકીનો સામનો કરવો પડ્યો હતો. વરસાદી પાણી ભરાતા લોકોના કામ અટક્યા હતા. તો ભારે ટ્રાફિક જામનો પણ સામનો કરવો પડ્યો. ઠેર-ઠેર પાણી ભરાતા લોકો તેને જોવા નીકળ્યા હતા. રસ્તા પર લોકોના આવવા-જવા કરતાં લોકોના ભરાયેલા પાણી જોવા માટેની ભીડ વધારે હતી. લોકો રીતસરના પાણીમાં છબછબીયા કરતાં જોવા મળ્યા હતા.
અમદાવાદના નીચાણવાળા વિસ્તારમાં લોકોને પાણી ભરાવાના કારણે હાલાકી પડી રહી છે. ગોતા અને સાયન્સ સિટીમાં 3 કલાકમાં 6 ઇંચ, બોપલમાં 4 ઇંચ, નરોડામાં 4 ઇંચ, ચાંદખેડા, સરખેજ, ચાંદલોડિયામાં 3 ઇંચ, ઉસ્માનપુરા બે ઇંચ વરસાદ નોંધાયો છે. બપોર બાદ મેઘરાજાએ બઘડાટી બોલાવી હતી. જેને પગલે વાતાવરણમાં ઠંડક પ્રસરી ગઈ હતી અને તાપમાનનો પારો ચાર ડિગ્રી સેલ્સિયસ ઘટી ઘટ્યો છે.
અમદાવાદમાં માત્ર 2 ઈંચ વરસાદમાં જ રસ્તાઓ બેટમાં ફેરવાતા પ્રિમોન્સૂન કામગીરી પર સવાલો ઊભા થઈ રહ્યા છે. ગોતા, એસજી હાઇવે, ન્યુ રાણીપ, જગતપુર, રાણીપ, ચાંદખેડા સહિતના વિસ્તારોમાં બે કલાકમાં ધોધમાર વરસાદના પગલે પાણી ભરાઈ ગયા છે. જેના પગલે વાહનચાલકોને અને લોકોને હાલાકીનો સામનો કરવો પડ્યો છે.
ગોતા અને સાયન્સ સિટીમાં ત્રણ જ કલાકમાં છ ઇંચ વરસાદ ખાબકતા પ્રીમોનસૂન પ્લાન ધોવાઈ ગયો હતો. બધી જ જગ્યાએ ફક્ત પાણી જ પાણી હતુ, રસ્તાઓ શોધવા જવા પડે તેવી સ્થિતિ હતી. ગોતા અને સાયન્સ સિટીના વિસ્તારના લોકો પણ અસમંજસમાં પડી ગયા હતા. આને મેઘમહેર કેવી કે મેઘકહેર તેના વિચારમાં પડી ગયા હતા.
રાજ્યમાં આગામી 7 દિવસ વરસાદની આગાહી છે. હવામાન વિભાગે રાજ્યમાં સાર્વત્રિક વરસાદની આગાહી કરી છે. રાજ્યમાં ગાજવીજ સાથે વરસાદ વરસશે. આજે ભરૂચ, સુરત, નવસારીમાં ભારે વરસાદની આગાહી છે. તો વલસાડ, દમણ, દાદરાનગર હવેલીમાં ભારે વરસાદ થઈ શકે છે. પોરબંદર, જૂનાગઢ, અમરેલીમાં ભારે વરસાદની આગાહી છે. ભાવનગર, ગીર સોમનાથમાં પણ ભારે વરસાદ આવી શકે છે.
