અમદાવાદ: ડોક્ટર બનવા માટે મેડિકલના અભ્યાસને લઈને GMERS દ્વારા હાલમાં કરવામાં આવેલા ફીમાં તોતિંગ વધારાનો હવે વિરોધ થઈ રહ્યો છે. શૈક્ષણિક વર્ષ 2024-25 માટે કરવામાં આવેલા ફી વધારાને રદ બાતદલ કરવાની માંગ ઉઠી છે.જે બાદ અમદાવાદના વાલીઓએ GMERS મેડિકલ કોલેજોમાં ફી વધારો પાછો ખેંચવા માંગ કરી રહ્યા છે. આજે વાલીઓએ કલેકટરને આવેદનપત્ર આપી ફી વધારો પાછો ખેંચવા રજૂઆત કરી છે. ફી વધારાના કારણે મધ્યમ વર્ગના બાળકોનું ડોક્ટર બનવાનું સપનું થાલી સપનુ જ રહેશે તેવું વાલીઓ જણાવી રહ્યા છે.
પ્રાપ્ત રિપોર્ટ મુજબ GMERSની 13 મેડિકલ કોલેજોની સાથે સાથે સુરત સહિત રાજ્યની મેડિકલ કોલેજોની ખાનગી, મેનેજમેન્ટ ક્વોટા અને NRI ક્વોટાની બેઠકોની ફીમાં તોતિંગ વધારો કરી દેવાયો છે. મેડિકલ કોલેજોમાં ખાનગી બેઠકોની એક વર્ષની ફી રૂ.3.30 લાખથી વધારી રૂ. 5.50 લાખ કરાઈ છે. જ્યારે મેનેજમેન્ટ ક્વોટાની એક વર્ષની ફી રૂ. 9.07 લાખથી વધારી રૂ. 17 લાખ અને NRI ક્વોટાની એક વર્ષની ફી રૂ. 22 હજાર યુએસ ડોલરથી વધારી રૂ. 25 હજાર યુએસ ડોલર કરાઈ છે. આમ, ખાનગી બેઠકોની ફીમાં 67%, મેનેજમેન્ટ ક્વોટાની બેઠકોની ફીમાં 87% અને NRI ક્વોટાની બેઠકોની ફીમાં 14% સુધીનો વધારો કરાયો છે.
બીજી તરફ ઇન્ડિયન મેડિકલ એસોસિએશન (IMA) પણ આ મુદ્દે આગળ આવ્યુ છે. ઇન્ડિયન મેડિકલ એસોસિએશન ગુજરાત બ્રાન્ચના હોદ્દેદારો પ્રમુખ ડો. ભરત કાકડીયા અને માનદ મંત્રી ડોક્ટર મેહુલ શાહે મુખ્યમંત્રી ભુપેન્દ્ર પટેલને પત્ર લખી અને મેડિકલના અભ્યાસમાં જીએમઈઆરએસ દ્વારા કરવામાં આવેલા તોતિંગ ફી વધારાને રદ બાતલ કરવા માગ કરી છે. તેઓએ જણાવ્યું છે કે, ઈન્ડિયન મેડીકલ એસોસિએશન, ગુજરાતનાં તબીબી વિદ્યાર્થીઓ, વાલીઓ અને તબીબી શિક્ષણનાં વ્યાપક હિતને ધ્યાનમાં રાખી આ તોતિંગ ફી વધારો તાત્કાલિક અસરથી રદબાતલ કરવા માટે આપને અનુરોધ કરીએ છીએ.
તમને જણાવી દઈએ કે ગત વર્ષે GMERS દ્વારા MBBS અભ્યાસક્રમ માટે શૈક્ષણિક વર્ષ 2023-24 માટે ફી વધારો કરવાનો નિર્ણય લીધો હતો. પરંતુ વાલીઓ અને વિદ્યાર્થીઓના અનુરોધ પછી ફી વધારો પાછો ખેંચવામાં આવ્યો હતો. પરંતુ હવે આ શૈક્ષણિક વર્ષથી તોતિંગ ફી વધારો કરવામાં આવતા સામાન્ય પરિવારમાંથી આવતા વિદ્યાર્થીઓ માટે ઇન્ડિયન મેડિકલ અસોસિએશન ગુજરાત બ્રાન્ચ દ્વારા મુખ્યમંત્રીને પત્ર લખીને ફી વધારો પાછો ખેંચવા માગ કરવામાં આવી છે.