અમદાવાદ: અમદાવાદમાં વધુ એક હિટ એન્ડ રનની ઘટના સામે આવી છે. 19 એપ્રિલની રાતે સાઉથ બોપલમાં પૂરપાટ ઝડપે જઈ રહેલા કારચાલકે રસ્તા પર ચાલીને જઈ રહેલા બે યુવકને ઉડાવ્યા હતાં. રસ્તા પર ચાલીને જતા બંને યુવકો કારની ટકરે 10 ફૂટ સુધી ઢસડાયા હતા. બોપલ પોલીસે આ અંગે ગુનો નોંધી તપાસ શરૂ કરી છે. જોકે, બંને યુવકને ઈજા થઈ હતી અને હાલમાં બંનેની સ્થિતિ સામાન્ય છે.
પ્રાપ્ત રિપોર્ટ મુજબ, સાઉથ બોપલમાં મેરી ગોલ્ડ એપાર્ટમેન્ટ પાસે રાતના સમયે બે યુવક ચાલીને જઈ રહ્યા હતા, ત્યારે પૂરપાટ ઝડપે આવી રહેલા કારચાલકે બંનેને પાછળથી જોરદાર ટક્કર મારી હતી. કારની ટક્કર વાગતા બંને યુવક દૂર સુધી ઢસડાયા હતા. અકસ્માત બાદ કારચાલક ત્યાંથી કાર લઈને નાસી ગયો હતો. બનાવની જાણ થતા બોપલ પોલીસે આ અંગે ગુનો નોંધી કારચાલકની શોધખોળ શરૂ કરી છે.
પ્રાથમિક જાણકારી પ્રમાણે અકસ્માતમાં ઈજાગ્રસ્ત થનાર મહારાષ્ટ્રથી એક કાર્યક્રમમાં હાજરી આપવા માટે આવ્યા હતા.બંનેને સારવાર માટે હોસ્પિટલમાં ખસેડવામાં આવ્યા હતા. હાલ બંનેની સ્થિતિ સારી છે. બનાવ અંગે બોપલ પોલીસે સીસીટીવીના આધારે તપાસ શરૂ કરી છે. ઈજાગ્રસ્તોના પરિવારજનોએ નબીરાને ઝડપી પાડવા માગ કરી છે.