અમદાવાદ : ગુજરાતમાં ચોમાસાની વિધિસર શરૂઆત થઈ ગઈ છે. દક્ષિણ ગુજરાત અને સૌરાષ્ટ્રને ધમરોળ્યા બાદ મોડી સાંજે અમદાવાદ શહેરમાં ધોધમાર વરસાદ વરસ્યો છે. શહેરમાં અડધા કલાકમાં અંદાજે એકથી દોઢ ઇંચ વરસાદ વરસ્યો છે. નારણપુરા, ગોતા, મણિનગર, નવરંગપુરા, નિકોલ, પાલડી સહિતના વિસ્તારમાં એક ઇંચ જ્યારે ચાંદખેડામાં અંદાજે દોઢ ઇંચ વરસાદ પડતા રોડ પર પાણી ભરાયા છે. ભારે વરસાદના કારણે ટ્રાફિક જામની સ્થિતિ સર્જાતા વાહનચાલકોને હાલાકી ભોગવવાનો વારો આવ્યો છે.
પ્રાપ્ત રિપોર્ટ મુજબ, અમદાવાદમાં ભારે ગરમી અને ભારે પવન બાદ વરસાદ ખાબક્યો છે. અમદાવાદમાં બપોર બાદ ભારે પવન ફૂંકાવા લાગ્યો હતો અને સમી સાંજે ભારે વરસાદની શરૂઆત થઈ હતી. મળતી માહિતી મુજબ, અમદાવાદ શહેરના નારણપુરા, ગોતા, મણિનગર, નવરંગપુરા, નિકોલ, પાલડી સહિત વિસ્તારોમાં ગાજ વીજ સાથે વરસાદ ખાબક્યો છે,
આ ઉપરાંત શહેરના SG હાઈવે સેટેલાઈટ, બોપલ, આંબલી, શેલા, સરખેજ સહિતના વિસ્તારોમાં ગાજવીજ સાથે વરસાદ થઈ રહ્યો છે. શહેરના વિવિધ વિસ્તારોમાં કડાકા અને ભડાકા સાથે વરસાદ થઈ રહ્યો છે. જોધપુર, શાસ્ત્રીનગર, વેજલપુર, થલતેજ, સેટેલાઈટ, ઓઢવા વગેરેમાં નીચાણવાળા વિસ્તારોમાં પાણી ભરાયા છે, અન્ડરગ્રાઉન્ડ પાર્કિંગ, અન્ડરપાસ રસ્તાઓમાં પણ પાણી ભરતા પરિવહન વ્યવસ્થા પર પણ અસર પડી છે.
અમદાવાદમાં મેઘરાજાએ ધબધબાટી બોલાવી છે. દિવસભર વાદળછાયું વાતાવરણ રહ્યું હતું અને ત્યારબાદ ઝરમર વરસાદ બાદ મોડી સાંજે મેઘરાજાએ ગાજવીજ સાથે તોફાની બેટિંગ કરી હતી. મોડી સાંજે શરૂ થયેલો વરસાદ શરૂ થતાં ઓફિસથી ઘરે જતા લોકો અટવાયા હતા. શહેરના નીચાણવાળા મોટાભાગના વિસ્તારો પાણી-પાણી થઇ ગયા છે.