અમદાવાદ : ટેક્નોલોજીના યુગમાં રાજ્યની સૌથી મોટી યુનિવર્સિટી એવી ગુજરાત યુનિવર્સિટીએ પણ ઑનલાઇન અભ્યાસ શરૂ કર્યો છે. ગુજરાત યુનિવર્સિટી દ્વારા વિદ્યાર્થીઓ માટે હવે ત્રણ સ્નાતક અને ત્રણ અનુસ્નાતક અભ્યાસક્રમોનો અભ્યાસ ઓનલાઈન કરી શકાશે. આ ઉપરાંત, ભારતીય જ્ઞાન પરંપરા (IKS) વિષયના ઓનલાઈન ક્લાસ વિનામૂલ્યે ચલાવવામાં આવશે.
પ્રાપ્ત રિપોર્ટ મુજબ, ગુજરાત યુનિવર્સિટી દ્વારા યુજીસી-માન્યતા પ્રાપ્ત છ અભ્યાસક્રમોને સંપૂર્ણ ઓનલાઈન માધ્યમથી ચલાવવાની મંજૂરી આપવામાં આવી છે. જેમાં સ્નાતક કક્ષાના અભ્યાસક્રમોમાં BA in English, B Com General, અને BCAનો, જ્યારે અનુસ્નાતક કક્ષાના અભ્યાસક્રમોમાં MA in English, M Com General, અને M Sc in Mathematicsનો સમાવેશ થાય છે.
આ અભ્યાસક્રમોમાં પ્રવેશ માટેની અરજીઓ આજથી જ શરૂ થઈ ગઈ છે અને અરજી કરવાની છેલ્લી તારીખ 7 ઓક્ટોબર, 2025 છે. આ અભ્યાસક્રમોમાં પ્રવેશથી લઈને પરીક્ષા સુધીની તમામ પ્રક્રિયાઓ ઓનલાઈન જ રહેશે. વિદ્યાર્થીઓ તેમના સ્માર્ટફોન, ટેબ્લેટ, લેપટોપ અથવા કમ્પ્યુટર જેવા કોઈપણ ઉપકરણથી આ અભ્યાસક્રમોમાં જોડાઈ શકે છે.
ગુજરાત યુનિવર્સિટીમાં કોઈ પણ વિદ્યાર્થી દુનિયાના કોઈપણ ખૂણેથી અભ્યાસ કરી શકે અને ઓનલાઈન પરીક્ષા આપી શકે તેવી વ્યવસ્થા યુનિવર્સિટીમાં ગોઠવાઈ રહી હતી. આખરે ગુજરાત યુનિવર્સિટીએ ઓનલાઈન અભ્યાસક્રમ શરૂ કર્યો છે.વિદ્યાર્થીઓ આગામી સાતમી ઓક્ટોબર સુધી આવેદન કરી શકશે.
ઉપરાંત ભારતીય જ્ઞાન પરંપરાના ક્લાસ વિનામૂલ્યે ઓનલાઇન ચલાવશે. જેમાં સેમેસ્ટર એક અને ત્રણ ના વિદ્યાર્થીઓને વિનામૂલ્યે અભ્યાસ કરાવાશે. એટલે કે ગુજરાત યુનિવર્સિટી વિશ્વની પ્રથમ યુનિ જે વિદ્યાર્થીઓને વિનામૂલ્યે અભ્યાસ કરાવશે.