અમદાવાદ : શહેરમાં માર્ગ અકસ્માતોની વધતી ઘટનાઓ વચ્ચે વધુ એક દુઃખદ બનાવ સામે આવ્યો છે. નરોડા નજીકના રિંગ રોડ વિસ્તારમાં મોડીરાત્રે એક કાર અકસ્માત સર્જાયો હતો. પ્રાથમિક માહિતી મુજબ, કાર તેજ ગતિએ દોડી રહી હતી ત્યારે ચાલકે અચાનક સ્ટીયરિંગ પરનો કાબૂ ગુમાવ્યો હતો. આકાશ ગોસ્વામી નામનો યુવક સાસરીમાં પત્નીને લેવા જઈ રહ્યો હતો, આ દરમિયાન અકસ્માત થયો હતો.
પ્રાપ્ત રિપોર્ટ મુજબ, ગાંધીનગરના વાવોલમાં રહેતો આકાશ ગોસ્વામી નામનો યુવક ચાંગોદરમાં આવેલી એક ખાનગી કંપનીમાં નોકરી કરે છે. આકાશની પત્ની બારેજડી ખાતે પિયરમાં ગઈ હતી. 12 ફેબ્રુઆરીના રોજ આકાશ તેના ઘરેથી પિયર પત્નીને લેવા જઈ રહ્યો હતો. આકાશ પૂર ઝડપે એસન્ટ કાર લઈને વટવા જીઆઇડીસી રોડ પરથી જઈ રહ્યો હતો. આ દરમિયાન સ્ટીયરિંગ પરનો કાબૂ ગુમાવતાં ગાડી ઝાડ સાથે અથડાઈ હતી.
કારની ટક્કર એટલી જોરદાર હતી કે કારનો કચ્ચરઘાણ વળી ગયો હતો. સ્થાનિક લોકો અને પસાર થતા વાહનચાલકો તરત જ ઘટનાસ્થળે દોડી આવ્યા હતા અને યુવકને બચાવવાના પ્રયાસ કર્યો હતો, પરંતુ તેનું ઘટનાસ્થળે જ મોત થઈ ગયું હતું.અને તેના પરિવારને આ ઘટનાની જાણ કરી દેવામાં આવી છે.સમગ્ર મામલે જે ડિવિઝન ટ્રાફિક-પોલીસે વધુ તપાસ હાથ ધરી છે.
આ ઘટના ફરી એક વખત રોડ સેફ્ટીના મુદ્દાને ચર્ચામાં લાવી છે. ગુજરાતમાં છેલ્લા કેટલાક મહિનાઓમાં અકસ્માતના કેસોમાં વધારો જોવા મળ્યો છે, જેમાં મોટા ભાગના કિસ્સાઓમાં ઝડપી વાહન ચલાવવું, ટ્રાફિક નિયમોનું ઉલ્લંઘન અને બેદરકારી મુખ્ય કારણો છે. પોલીસ વિભાગ દ્વારા લોકોને અપીલ કરવામાં આવી છે કે વાહન ચલાવતી વખતે ઝડપનું ધ્યાન રાખો અને ટ્રાફિક નિયમોનું પાલન કરો, જેથી આવી દુખદ ઘટનાઓને અટકાવી શકાય.