અમદાવાદ : શહેરમાં વધુ એક ફાયરિંગની ઘટના સામે આવી છે. શહેરના ચાણક્યપુરી વિસ્તારમાં બે રાઉન્ડ ફાયરિંગ થયું છે. આ ફાયરિંગ પ્રેમ પ્રકરણમાં થયું હોવાનું પ્રાથમિક તપાસમાં સામે આવ્યું છે. આ ઘટનામાં એક યુવાન ઇજાગ્રસ્ત થયો છે જેની હાલ સારવાર ચાલી રહી છે. આ અંગે આરોપીઓને ઝડપી પાડવા સોલા પોલીસે કવાયત હાથ ધરી છે.
પ્રાપ્ત રિપોર્ટ મુજબ, અમદાવાદ સોલા પોલીસ સ્ટેશન હદ વિસ્તારમાં આવેલા ચાણક્યપુરીના ઉગતી બંગલો ચાર રસ્તા પાસે મોન્ટુ દેસાઈ નામના યુવકે પાટણના યુવક પર ફાયરિંગ કર્યું છે. મોન્ટુ દેસાઈની કાકાની દીકરીને પાટણના અન્ય યુવક સાથે પ્રેમ સંબંધ હતો. જે બાબતે અગાઉ ઝઘડો થયો હતો અને સમાધાન પણ થયું હતું.
જોકે, મોન્ટુ દેસાઈના મનમાં આ વાતનો રોષ યથાવત હતો. જ્યારે મોન્ટુ અને યુવક બંને ચાણક્યપુરી વિસ્તારમાં ભેગા થયા, ત્યારે તેમની વચ્ચે ફરીથી બોલાચાલી થઈ હતી. ઉગ્ર બનેલા મોન્ટુ દેસાઈએ પોતાની પાસે રાખેલી રિવોલ્વર કાઢી યુવક પર ફાયરિંગ કર્યું હતું. મોન્ટુએ યુવકના પગમાં ગોળી મારતા યુવક લોહીલુહાણ હાલતમાં ત્યાં જ ઢળી પડ્યો હતો.
ગોળી વાગતા યુવક ઇજાગ્રસ્ત થયો હતો, જેથી યુવકને તાત્કાલિક સારવાર માટે હોસ્પિટલ ખસેડવામાં આવ્યો છે. મોન્ટુ સ્થળ પરથી ફરાર થઈ ગયો છે. સોલા પોલીસે ઘટના સ્થળે પહોંચીને તપાસ શરૂ કરી છે. પોલીસે હત્યાના પ્રયાસનો ગુનો નોંધી ફરાર મોન્ટુ દેસાઈની ધરપકડ કરવા તજવીજ હાથ ધરી છે.