અમદાવાદ : સામાન્ય અને મધ્યમવર્ગીય પરિવારોને પોતાનું ઘર મળી રહે તે હેતુથી સરકાર દ્વારા પ્રધાનમંત્રી અને મુખ્યમંત્રી આવાસ યોજના અંતર્ગત મકાનો ફાળવવામાં આવે છે. જોકે, અમદાવાદમાં કેટલાક લાભાર્થીઓ આ મકાનોનો દુરુપયોગ કરી રહ્યા હોવાનું સામે આવ્યું છે. સાયન્સ સિટી રોડ પર આવેલી ‘એવરેસ્ટ એન્કલેવ’ આવાસ યોજનામાં ગેરકાયદેસર રીતે PG (પેઈંગ ગેસ્ટ) અને હોટલ સ્ટે ચાલતું હોવાની વિગતો બહાર આવતા મ્યુનિસિપલ કોર્પોરેશનની વિજિલન્સ ટીમે તવાઈ બોલાવી છે.અરે હદ તો ત્યારે થાય છે જ્યારે હાઉસિંગના મકાનમાં PG ચલાવવા બાબતે તેમજ હોટલની જેમ ભાડે આપવા બાબતે સોશિયલ મીડિયામાં જાહેરાત પણ અપાતી હતી
પ્રાપ્ત રિપોર્ટ મુજબ, સાયન્સ સિટી વિસ્તારમાં અમદાવાદ મ્યુનિસિપલ કોર્પોરેશનની પ્રધાનમંત્રી આવાસ યોજના એલ.આઈ.જી. 19, એવરેસ્ટ એન્કલેવમાં કુલ છ બ્લોક તથા 336 મકાન આવેલા છે. જેમાં આવેલ બ્લોક નંબર 2, મકાન નંબર 305 તથા બ્લોક નંબર 5, મકાન નંબર 105 ભાડે આપવાની ફરિયાદ મળી હતી. જેના આધારે વિજિલન્સ (એસ્ટેટ/ ટીડીઓ) દ્વારા સરપ્રાઈઝ ચેકિંગ હાથ ધરવામાં આવ્યું. જે દરમિયાન બ્લોક નંબર 5, મકાન નંબર 105 માં ભાડુઆત દ્વારા વપરાશ થતો હોવાનું માલુમ પડ્યું છે. જ્યારે બ્લોક નંબર 2, મકાન નંબર 305 એક વેબસાઇટ પર રજિસ્ટર થયું હોવાનું માલુમ પડ્યું હતું.એટલું જ નહીં, આ મકાનોને પ્રતિ દિવસના ભાડા લેખે ‘હોટલ સ્ટે’ તરીકે પણ ઉપયોગમાં લેવામાં આવતા હતા. આ માહિતીના આધારે AMCની વિજિલન્સની ટીમે ઓચિંતું ચેકિંગ હાથ ધર્યું હતું.
વિજિલન્સની ટીમે ઓચિંતું ચેકિંગ દરમિયાન બે મકાનોમાં સ્પષ્ટપણે PG એક્ટિવિટી ચાલતી હોવાનું અને વ્યાપારી હેતુ માટે તેનો ઉપયોગ થતો હોવાનું માલૂમ પડ્યું હતું. આ નિયમોનું સરેઆમ ઉલ્લંઘન હોવાથી તંત્ર દ્વારા તાત્કાલિક ધોરણે આ બંને મકાનોને સીલ કરી દેવામાં આવ્યા છે. સરકારી નિયમો મુજબ, આવાસ યોજનાના મકાનો જે-તે લાભાર્થીએ પોતાના રહેઠાણ માટે વાપરવાના હોય છે, તેને ભાડે આપવા કે વ્યાપારી ઉપયોગ કરવો ગુનો બને છે.
આ કાર્યવાહીને પગલે આવાસ યોજનામાં મકાનો ભાડે આપી દેનારા અન્ય લાભાર્થીઓમાં પણ ફફડાટ વ્યાપી ગયો છે. કોર્પોરેશન આગામી દિવસોમાં અન્ય આવાસ યોજનાઓમાં પણ આ પ્રકારનું ચેકિંગ તેજ કરે તેવી શક્યતા છે.